Вьетнамда оилаларга иккитадан ортиқ фарзанд кўришни тақиқловчи демографик сиёсат бекор қилинди. Мамлакат ҳукумати туғилиш даражасининг пасайиши ва демографик инқироз билан шундай курашмоқда. Бу ҳақда Bloomberg хабар бермоқда.
Янги қарор Миллий ассамблеянинг Ханойдаги Доимий қўмитаси томонидан тасдиқланди. Унга кўра, эр-хотинлар қачон фарзанд кўриш, уларнинг сони қанча бўлиши ва қандай вақт оралиғида туғилиши кераклигини ўзлари ҳал қилишлари мумкин бўлади.
Аввалги қонун алоҳида ҳолатлардан ташқари ҳар бир оилада фақат бир ёки икки фарзанд туғилишига рухсат берар эди. Чеклов 1988 йилда туғилиш коэффициенти (бир аёлдан туғилган болалар сонининг ўртача кўрсаткичи) 4 дан ошганда жорий этилган эди.
Ўшандан бери Вьетнамда туғилиш сони камайиб борган. 2024 йил декабрь ойида у рекорд даражада пастга тушган ва туғилишнинг умумий коэффициенти ҳар бир аёлга 1,91 нафаргача пасайган (аҳолининг оддий такрор барпо бўлиши учун 2,1 керак бўлади).
Вьетнам Соғлиқни сақлаш вазирлигининг маълум қилишича, “Аҳолишунослик тўғрисида”ги қонунга киритилган янги ўзгартиришлар мамлакатнинг турли ҳудудлари ва демографик гуруҳлари орасидаги туғилиш кўрсаткичларидаги ўсиб бораётган номутаносибликни бартараф этишга қаратилган. Вазирлик аллақачон мамлакатнинг ташвишли келажагидан хавотирда — бугунги кундаги паст туғилиш даражаси келажакда Вьетнамнинг иқтисодий барқарорлиги ва муваффақиятли ривожланишига хавф солиши мумкин.
БМТ жамғармаси ҳисоботида таъкидланишича, Вьетнамда аҳолининг тез қариши кузатилмоқда. Атиги 20 йил ичида у “қариётган”дан “кекса” мамлакатга айланиши мумкин.
Демография соҳасидаги олимларнинг башоратларига кўра, Вьетнамда меҳнатга лаёқатли ёшдаги аҳоли сонининг энг юқори чўққиси 2042 йилга тўғри келади ва 2054 йилдан бошлаб мамлакат аҳолиси орасида туғилиш пасаяди. Бу эса ишлаб чиқаришда ишчи кучи етишмаслигига, аҳоли сонининг камайишига ва унинг қаришига олиб келади.
Март ойида Хитой ҳукумати туғилиш даражасини ошириш мақсадида молиявий тўловлар ва оналарга бепул сут бериш орқали рағбатлантириш чораларини кўришга қарор қилди. Қайд этиш лозим, болалар парвариши учун катта миқдордаги субсидиялар бутун Хитой бўйлаб мамлакатнинг туғилишни ошириш бўйича кенг қамровли саъй-ҳаракатлари доирасида тақдим этилмоқда. Хусусан, Хитой шимолида жойлашган Хух-Хото шаҳрида ота-оналарга 10 минг юан (тахминан 688 минг тенге) миқдорида бир марталик субсидия берилиши йўлга қўйилган.
Изоҳ (0)