Андижонда қорамолларда учраётган янги касаллик тури ҳақида тарқалган хабарлар юзасидан муносабат билдирилган эди. Ветеринария ва чорвачиликни ривожлантириш қўмитаси тошма аниқлангани юзасидан текширув натижасини эълон қилди.
Қайд этилишича, ҳолат Ветеринария ва чорвачиликни ривожлантириш қўмитаси Ишчи гуруҳи ва ички ишлар идоралари мутахассислари билан ҳамкорликда ўрганилди. Воқеа жойи аниқланиб, ҳолат назоратга олинди. Ижтимоий тармоқларда расм ва видеолари тарқалган қорамол Избоскан тумани “Анорзор” МФЙда яшовчи Хайрулла Эшонжоновга тегишли экани маълум бўлди.
Қорамол клиник кўрикдан ўтказилиб, олинган қон ва бошқа намуналар лаборатория текширувларидан ўтказилганда ушбу сигир нодуляр дерматит ёки номаълум касаллик билан эмас, аллергик тошмага чалингани аниқланди.
Маълум бўлишича, сигирнинг терисига бундан 24 кун муқаддам, яъни 15 июнь куни аллергик тошма тошган. Бу ҳақда эгаси маҳаллий ветеринария мутахассисига мурожаат қилган. Мутахассислар клиник кўрикдан ўтказиб, даволаш ишлари олиб борган. Қорамолнинг иштаҳаси ўрнига келган. Умумий ҳолати яхшиланган ва аллергик тошмалар йўқолган. 18 июнь куни ушбу сигир соғлом бузоқ туққан. Ҳозирда сигир ва боласининг умумий ҳолати яхши.
Суриштирув давомида унга озуқа орқали аллергик тошма тошганини эгаси ҳам тасдиқлади. Хонадондаги қолган 8 бош қорамолда бундай ҳолат кузатилмаган.
Изоҳ (0)