Ukraina prezidenti Vladimir Zelenskiy hududiy masalalarni muhokama qilish uchun Rossiya prezidenti Vladimir Putin bilan uchrashishga tayyorligini aytdi. Bu haqda u matbuot anjumanida ma’lum qildi.
Zelenskiy tegishli bayonotni AQSH rahbari Donald Tramp va Yevropa yetakchilari bilan uchrashuvdan so‘ng e’lon qildi. U Rossiya dastlab Ukraina ishtirokida ikki tomonlama uchrashuv, keyinchalik esa uch tomonlama muzokara taklif etganini eslatdi.
Biz rahbarlar darajasidagi har qanday formatga tayyormiz, deya ta’kidladi Zelenskiy.
Ukraina prezidenti hududlar masalasini o‘zi va Putin o‘rtasida muhokama qilishni xohlayotganini aytdi. Shuningdek, ularning uchrashuvi hech qanday shartlarsiz o‘tkazilishini istashini ta’kidladi. Zelenskiy Tramp bilan uchrashuvda xaritada ko‘rsatilgan bosib olingan hududlar foizi ustida bahslashganini va bu masalada yaxshi bilimga egaligini qo‘shimcha qildi.
Bundan tashqari, u AQSHga qurol-yarog‘ bo‘yicha kelishuv taklif qilganini ham tasdiqladi. Bu paketda Ukrainada mavjud bo‘lmagan texnika — avvalo samolyotlar, havo hujumidan mudofaa tizimlari va shunga o‘xshash qurollar bor.
Bizning takliflarimiz asosida 90 milliard dollarlik paket bor, deb qo‘shimcha qildi Ukraina prezidenti.
Zelenskiy chet el harbiy kuchlari Ukraina hududida joylashishi mumkinligi haqida alohida izoh berdi.
Biz ko‘ngillilar koalitsiyasi haqida gapiryapmiz, 30 ta mamlakat haqida suhbat bo‘ladi, bu mamlakatlarning har biri amalda nimani taklif qila olishini aniqlaymiz. Kimdir, ehtimol, o‘z qo‘shinini yuborishga tayyor bo‘ladi. Kimdir razvedka bilan shug‘ullanadi, boshqasi dengiz xavfsizligi yoki havo xavfsizligi bo‘yicha yordam beradi. Ba’zilari konstitutsiyaviy cheklovlar tufayli bevosita ishtirok eta olmaydi, lekin Ukraina ishlab chiqarishini moliyalashtirishga qodir, deya tushuntirdi u.
Tramp va Zelenskiy uchrashuvi
18-avgust kuni kechqurun Tramp Zelenskiy va Yevropa yetakchilari bilan muzokaralar o‘tkazdi. Ochiq qism yarim soatdan sal kamroq davom etdi. Muzokaralarda NATO bosh kotibi Mark Ryutte, Yevrokomissiya rahbari Ursula fon der Lyayen, Buyuk Britaniya bosh vaziri Kir Starmer, Fransiya prezidenti Emmanuel Makron, Germaniya kansleri Fridrix Merts, Finlyandiya prezidenti Aleksandr Stubb, Italiya bosh vaziri Jorj Meloni ishtirok etdi.
Trampning o‘zi uchrashuvni “juda samarali” deb atadi. Uning so‘zlariga ko‘ra, tomonlar AQSH bilan kelishilgan holda Yevropaning turli davlatlari tomonidan taqdim etiladigan Ukraina uchun xavfsizlik kafolatlarini muhokama qilgan.
Izoh (0)