АҚШ президенти Дональд Трамп 18 август куни Украина раҳбари Владимир Зеленский билан учрашув чоғида матбуотга нотўғри маълумотлар берди. CNN ҳарбий ёрдам бўйича маълумотни текшириб чиқди.
Трамп нутқи давомида АҚШ Украинага уруш даврида 300 миллиард доллардан ортиқ ёрдам бергани ҳақида гапирди. Бошқа нуқтида эса “Менимча, бу рақам 300 миллиард доллардан анча юқори. Балки 350 миллиард бўлиши мумкин”, деган эди.
Бироқ фактлар бу даъвони рад этади. Германиядаги Киeл Иқтисодиёт институти маълумотларига кўра, 2022 йил январь охиридан 2025 йил июнигача АҚШ Украинага ҳарбий, молиявий ва гуманитар ёрдам сифатида 134 миллиард доллар ажратган. Бу АҚШнинг ушбу давр мобайнида ваъда қилган 139 миллиард долларининг деярли ҳаммасини ташкил қилади.
АҚШ Бош инспекторига кўра, 2025 йил мартигача Украина учун жами 185 миллиард доллар маблағ тасдиқланган, шундан қарийб 90 миллиард доллари реал сарфланган. Бироқ бу суммага АҚШ ичида қурол ишлаб чиқариш учун кетган маблағлар ва бошқа давлатларга ажратилган ёрдам ҳам киритилган.
CNN сўровидан кейин Оқ уй расмийси аноним тарзда жавоб қайтариб, инспектор келтирган 185 миллиард долларлик рақамни тилга олган. У, шунингдек, G7 ташаббуси доирасида берилган 20 миллиард долларлик қарзни ҳам эслатган.
Шунга қарамай, бу рақамлар ҳам Трампнинг “350 миллиард долларлик” даъвосига яқинлашмайди. Расмийлар “ҳисоб-китобда” ҳатто Украинага алоқаси бўлмаган нарсаларни ҳам қўшиб юборган:
- Россия босқинидан кейин АҚШ оилалари сезган 90 миллиард доллардан ортиқ инфляция;
- Россияга қарши санкциялар ортидан АҚШ экспортининг 16 миллиард долларга камайиши;
- Уруш сабаб ўғит нархининг ошиши билан боғлиқ 7 миллиард долларлик қўшимча харажат.
Мутахассисларнинг фикрича, буларнинг ҳеч бири Украинага берилган ёрдам сифатида ҳисобланиши мумкин эмас. Айниқса, америкаликларнинг инфляция туфайли кўрган зарари Украинага ёрдам деб кўрсатилиши мутлақо мантиқсиз.
Изоҳ (0)