Неслиҳан Атагулнинг турмуш ўртоғи энг кўп муҳокама қилинадиган турк сериали юлдузлари қаторига киради. Кадир Доғулу машҳур турк актёр ва продюсеридир. Бироқ сўнгги бир неча йил давомида унинг номи жанжаллар билан боғлиқ ҳолатларда тилга олинмоқда.
-LlFCiI7o.avif)
Абдулкадир Доғулу 1982 йил 19 апрелда Мерсинда кўп болали оилада дунёга келган — унинг беш акаси бор. Актёрнинг ота-онаси камбағал яшаганидан, у ёшлигидан ишлашга мажбур бўлган. 17 ёшида у ўзига энг яқин бўлган акаси Камол билан бирга Истанбулга кўчиб ўтган. Кадир узоқ вақт давомида бармен бўлишни орзу қилган. Бироқ Истанбулда яшаш учун Доғулу етарли даромад топа олмаган. У аллақачон Мерсинга қайтишни режалаштирган эди, аммо сўнгги лаҳзада фикридан қайтади. Келишган ва новча йигитни моделлик агентлиги вакили пайқаб қолиб, уни суратга тушишга таклиф этади.
Кўп ўтмай, Кадирнинг суратлари продюсер Басак Абажигил эътиборини ҳам тортади ва у йигитни кинога таклиф қилади. Доғулу актёрлик ҳақида Истанбулга кўчиб ўтганидан кейингина орзу қила бошлаган.
“Ўша пайтларда кинога бориш катта бахт эди. Илк бор театрга Левент Қиржа ва Али Пойразўғли саҳналаштирган спектаклни кўргани борганман. Айнан ўшанда актёр бўлишни орзу қилаётганимни англадим. Аммо бу деярли имконсиз эди, вазият тақозосига кўра мен бошқа йўлни танлашим керак эди”, деб эслайди у.
Ижоди
Кадир Доғулу 2010 йилда “Кичик сирлар” сериалида Али ролини ижро этиб, дебют қилади. Сўнгра у “Ёмон еттилик” кўп қисмли фильмида Гуней образини гавдалантиради. 2013 йилда турк актёри “Ишқ соҳиллари” сериалидаги бош рол унга оламшумул шуҳрат олиб келади. Шу йили Кадир яна бош ролда ўйнаган “Менинг ҳикоям бор” тўлиқ метражли фильм премераси ҳам бўлади.
Доғулу муваффақиятга эришиш учун кўп меҳнат қилиш кераклигини англайди. У кастингларда қатнаша бошлайди ва унинг карьераси муваффақиятли ривожланади. Турк актёри “Севгилим, Албора”, “Муҳташам юз йил. Кўсем салтанати”, “Менга севишни ўргат”, “Юқори табақали жамият”, “Қайта учрашиш”, “Муҳаббат рецепти”, “Тун сўнгида” ва бошқа фильмларда рол ижро этади.
Томошабинлар Кадирни сўнгги марта 2023 йилда экранларда кўрган. Ўшанда у “Митат” фильмида бош ролни ижро этганди. Кейинчалик турк актёри бутун эътиборини продюсерликка қаратишга қарор қилади.
Шахсий ҳаёти
“Ишқ соҳиллари” сериали суратга олинаётганда Кадир Неслиҳан Атагул билан танишган. Унинг айтишича, қизни кўриши биланоқ севиб қолган.
“Кимнидир севиб қолиш тақдирга боғлиқ бўлганда, бу жараённи назорат қила олмайсиз. Сизга ёқадиган ва тақдирингизга айланадиган инсонни қачон ва қаерда учратишингизни билмайсиз. Омадингиз келса, ҳақиқий туйғу нималигини англаб етасиз. Бир қарашда ўртангизда учқун пайдо бўлади. Агар ўшанда шеригим Неслиҳан эмас, бошқа актриса бўлганида, уни ҳам севиб қолардим деб ўйламайман”, дея таъкидлаган эди у.
Турдизи юлдузлари 2016 йил июлида 10 ёш фарқига қарамай, никоҳдан ўтади. Тўйдан бир неча ой ўтгач, матбуотда Кадирнинг хиёнати ҳақида хабарлар тарқалади. Жуфтлик бундай миш-мишларни рад этган бўлса-да, Неслиҳаннинг яқинлари унинг бундай хабарларни жуда оғир қабул қилганини таъкидлайди.
Кейинчалик маълум бўлдики, Кадир Неслиҳанни ўзи “маънавий маърифат мактаби” деб атайдиган Бектоший тариқатига қўшилишга мажбурлаган. Миш-мишларга кўра, бу тариқатга эргашган эркаклар хотинларидан ташқари бошқа аёллар билан алоқада бўлишлари шарт экан. Хотинлар эса эрларининг барча кўрсатмаларини сўзсиз бажаришлари лозим экан. Доғулу 2022 йилдаги суҳбатида Бектоший тариқати унинг рафиқаси учун ўзига хос мактабга айланганини шахсан тасдиқлаган.
Кейинчалик оммавий ахборот воситаларида Кадирнинг тунги клубларда нотаниш аёллар даврасида тушган кўплаб суратлари пайдо бўла бошлади. Неслиҳан яна жамоатчилик олдида эрини ҳимоя қилиб, ҳеч қандай хиёнат бўлмаганини таъкидлади. Кейинроқ эса эри ўзи учун энг азиз инсон эканлигини, ҳатто онасидан ҳам муҳимроқ эканлигини айтди. Турк актрисасининг бундай эътирофлари мухлисларини ҳайратга солди. Мухлислари ҳамон Кадирни Неслиҳанни шахс сифатида синдирган, уни онаси ва бошқа қариндошлари билан алоқани узишга мажбур қилган ва ўзини унинг ягона ҳаёт мазмунига айлантирган моҳир манипулятор деб ҳисоблашмоқда.
Шу билан бирга, Доғулунинг ўзи узоқ йиллардан бери стилист, раққос ва қўшиқчи бўлган акаси Камол билан мулоқот қилмайди. Уларнинг низоси сабаблари ҳақида аниқ маълумот йўқ. Бироқ бир сафар Камол Неслиҳан учун уйининг эшиклари доимо очиқлигини, Кадир билан эса уларни фақат қон-қариндошлик алоқаси боғлаб туришини айтган. Ўшанда кўплаб турк блогерлари Кадирнинг акаси унинг турмуш тарзи ва оилавий ҳаётидаги манипуляцияларини қоралашини ва айнан шу нарса улар ўртасидаги келишмовчиликка сабаб бўлганини ёзган. Машҳурларнинг ўзлари тафсилотларни ошкор қилмаган.
Кадир Доғулунинг ўзи Неслиҳанга ҳеч қачон хиёнат қилмаганини ва юрагини фақат унга бағишлаганини таъкидлаб келган. Шунингдек, Атагул эрининг ҳаётига салбий таъсир кўрсатгани ҳақидаги барча миш-мишларни инкор этади. 2025 йил март ойида эр-хотин илк бор ота-она бўлишди - улар ўғил фарзанд кўриб, унга Азиз деб исм қўйишди.
Продюсерлик компанияси билан боғлиқ можаро
2020 йилнинг ёзида Неслиҳан Атагулнинг турмуш ўртоғи Алим Япıм номли ўз продюсерлик компаниясини ташкил этгани маълум бўлди. Айнан шу компания “Тунги нур”, “Тун охирида” ва “Митат” каби фильмларни суратга олган.
2024 йил январида Доғулу компанияси у продюсерлик қиладиган янги сериал — “Муҳаббат компаси” устида иш бошлади. Бироқ дастлабки етти қисм суратга олингач, кутилмаганда жамоа ўз фаолиятини тўхтатганини эълон қилди. Кейинчалик оператор ва монтажчилар бир неча ойдан бери маош олмаётганларини айтишди. Лойиҳа актёрлари ҳам бу маълумотни тасдиқлашди, аммо муаммолар вақтинчалик бўлишига умид билдирдилар. Бироқ 2024 йил августида Доғулу ўз продюсерлик компаниясини ёпгани, бу ҳақда ходимларни огоҳлантирмагани ва уларга нафақат компенсация, балки иш ҳақи ҳам тўламагани маълум бўлди. Кейинроқ актёр ўз фирмасини банкрот деб эълон қилишни сўрагани аниқланди. Иш ҳозирда суд томонидан кўриб чиқилмоқда.
Кадир Доғулу ҳозирда
Ҳозирги кунда Кадир Доғулу ниҳоятда ёпиқ ҳаёт кечирмоқда. У мухлислари билан ижодий режаларини ўртоқлашмайди, аксинча бўш вақтини рафиқаси ва ўғли ёнида ўтказади.
Изоҳ (0)