Эронлик хонанда Араш ва ўзбекистонлик продюсер ўртасидаги можародан яхшигина хабарингиз бор. Англаганингиздек, Араш яқинда Андижонда бўлиб ўтиши режалаштирилган фестивалга салкам 165 минг доллар гонорар эвазига келмоқда. Андижонга келган Араш Ўзбекистон суди қарорига кўра, Тошкентдаги концертига келмай ўзбек продюсерига етказган 25 минг доллар зарарни қоплайдими? МИБ Арашни жавобгар қилишга ваколатлими? “Дарё” Арашдан жабрланган Нигора Соим бугун шу мавзу ҳақида сўз юритади.
Араш 2017 йил Тошкентда бўлиб ўтиши режалаштирилган концертига олдиндан гонорар олган бўлса-да, келмаган. Шу туфайли ўзбекистонлик тадбиркор 50 минг доллар зарар кўрган. 2018 йилда Тошкент вилояти хўжалик суди тадбиркорнинг фойдасига 24 797 АҚШ доллари миқдоридаги зарарни қоплаш тўғрисида қарор чиқарган, аммо қарор ҳамон ижро этилгани йўқ.
2017 йил концертлар ташкилотчилиги билан шуғулланиб юрган пайтим Арашни олиб келайлик деган таклиф бўлди. Арашга алоқага чиқилди. Унинг гапи билан продюсери Генри Улман билан гаплашиб, 14 август куни концерт ўтказиш бўйича шартнома тузганмиз.
Эронлик хонанданинг гонорари 40 минг доллар эди. Бу Араш учун қиммат нарх. Аслида 25 минг доллар бўлиши керак эди. Созандалар жамоаси билан келишини айтгач, шу нархга кўнганмиз. Хуллас 13 кишига билетлар, визалар олдик. Концертда мухлислар билан ўйинлар ўйнаш, викториналар қилишни режа қилиб, Араш номидан совғалар ҳам олдик.
Шартнома шартларига кўра, шартнома тузилганидан сўнг дастлабки 10 минг долларни ўша заҳоти ўтказиб беришимиз, кейинги 10 минг долларни эса Араш Тошкентга келишидан икки ҳафта олдин тўлашимиз керак эди. Қолган 20 минг долларни эса Араш Тошкентга келган пайтда олиши лозим эди. 14 августдаги шартномага кўра, дастлабки 10 минг долларни ўтказиш учун банкка бордим.
Банкдагилар улар берган ҳисоб рақам офшор компанияга тегишли, бошқа ҳисоб рақам беришсин дейишди. Арашнинг продюсери билан гаплашиб, шартномани янгиладик. Шартномани янгилаш давомида фақат арбитраж суди эмас, Ўзбекистоннинг иқтисодий судларини ҳам қўшмоқчи бўлдик. Шу масалада анча муҳокама қилиб қолиб, ўртада озгина вақт ўтди. Сўнгра биз пулни ўтказдик. Кейин менда билетлар сотилиши билан боғлиқ муаммолар туғилгач, концерт кунини 13 октябрдан 31 октябрга кўчирдик, дейди Нигора Соим.
Суҳбатдошнинг тушунтиришича, концерт куни ўзгаргач, Араш видеомурожаатини янгилаб, 31 октябрь куни Тошкентга бораман дея мухлислари учун видео юборган. Аммо унинг продюсери концерт ўзгаргани учун қилинадиган хат-ҳужжатларни имзолашдан бош тортган. Шунингдек, концерт учун тўланиши лозим бўлган гонорарини тўлиқ, олдиндан олмоқчи бўлган.
Арашнинг продюсери шартномани янгилашни истамади. “Мана видеомурожаат жўнатдик, концерт 31 октябрга деб. Сизларга шу етади. Ўшани олиб бориб кўрсатгин”, деган. Мен эса “Биз ҳужжат билан ишлаймиз”, дедим. Хуллас шартнома янгилангани боис улар талаб қилган гонорарнинг қолган қисми — 20 минг долларни улар айтган вақтда банкдан юборолмадик. Лекин Дубайда яшайдиган танишлар орқали пулни продюсернинг уйигача олиб бордик. Фақат бизнинг номимиздан пул олиб борганлар пулни олганингни тасдиқлаб имзо қўйгин дейишса, йўқ деган ва пулни олмаган. Шу-шу концерт қолдирилди, дейди суҳбатдош.
“Дарё” Бош прокуратура ҳузуридаги Мажбурий ижро бюроси ахборот хизмати билан боғланиб, Тошкент вилояти хўжалик судининг 2018 йилдаги қарори ижроси таъминланмагани сабаби билан қизиққанди. МИБ матбуот котиби Фаррух Тошпўлатов журналистнинг “Араш эрта индин Андижонга фестивалга келса, МИБ суд қарори ижросини таъминлайдими”, дея берилган саволига жавоб берар экан “Бу иш бўйича МИБга ижро ҳужжати етиб келмаган”, деганди.
Араш ва ўзбек продюсери ўртасидаги можаро кун тартибига чиққани учунми суҳбат давомида Нигора опага Ташқи ишлар вазирлигидан қўнғироқ қилиб қолишди. Масъулнинг билдиришича, Ўзбекистон судининг Арашга нисбатан чиқарган қарори ижросига ҳалигача киришилмаган. Шу сабаб Андижонга келган Араш қўшиғини айтиб, ҳеч нарса бўлмагандек 165 минг доллар гонорарини олиб, яна юртига қайтиб кетиш эҳтимоли юқори.
Суд қарори чиққанидан бери етти йил ўтган бўлса, шу етти йилда максимум ҳаракат қилдим. Воқеа руҳан ҳам мени синдирди. Мен ходимлардан ҳам, юқори турувчилардан ҳам, ҳеч кимдан хафа эмасман. Қачонлардир бизда ҳам “Эй, хато қилдингми? Жавоб бер. Мана бу ерда бизнинг судимиз майнавозчилик эмас сенга”, дейдиган ташкилотлар бўлар. Раҳбариятга шикоят эмас, илтимоснома, агар мумкин бўлса, шу ишни назоратга олинг, дейди Нигора Соим.
Эслатиб ўтамиз Андижонда бўлиб ўтадиган “Дунё садолари”га таклиф қилинган Арашга андижонликлар 2 млрд 95 млн сўм гонорар ваъда қилган.
Изоҳ (0)