Тез айнийди: музлаткич эшигида сақлаш мумкин бўлмаган 7 та маҳсулот

Кунига неча марта музлаткични очасиз? Беш? Ўн марта? Энди бу рақамни оила аъзоларингиз сонига кўпайтиринг. Ҳар сафар эшик очилганда унинг ички қисми бир оз исийди, кейин яна совийди. Айрим маҳсулотлар учун бундай ҳарорат ўзгаришлари жуда зарарли: улар бактериялар кўпайишига, маҳсулотнинг бузилишига ва таъмнинг ўзгаришига олиб келади. Қуйида музлаткич эшигида сақлаш мумкин бўлмаган 7 маҳсулотни санаб ўтамиз.

1. Тухум

Кўпчилик музлаткичларда тухум учун алоҳида бўлим мавжуд. Аммо бу асосан маркетинг усули бўлиб, амалда фойда бермайди. Тухум ҳарорат ўзгаришига жуда сезгир маҳсулот. Музлаткич тез-тез очилганда унинг қобиғида конденсат ҳосил бўлади, бу эса микробларнинг майда ёриқлардан ичкарига киришига имкон яратади.

Қаерда сақлаш керак: ўрта жавонда, орқа деворга яқин жойда.

2. Сут

Сут ҳам яроқлик муддати тез тугайдиган маҳсулотлардан. Эшикнинг доимо очилиб-ёпилиши туфайли у ердаги жавон ҳарорат тез-тез ўзгаради, бу эса сутнинг тез айнишига олиб келади. Иссиқ кунларда эса бу жараён бир неча баробар тезлашади.

Қаерда сақлаш керак: асосий камеранинг чуқур қисмида, иложи бўлса, энг пастки қисмида. Чунки бу ер музлатгичнинг энг совуқ жойидир.

3. Йогурт

Кичкина стакан ёки идишлардаги йогуртларни эшикка қўйиш қулайдек туюлади. Аммо бу ҳам нотўғри фикр.

Қаерда сақлаш керак: сут билан бир қаторда — пастки ёки ўрта жавонда, орқа деворга яқин жойда.

4. Пишлоқ

Пишлоқлар ҳам ҳароратнинг “совуқ-иссиқ-совуқ” қабилида ўзгаришига чидамли эмас. Бунинг оқибатида таъмини ўзгартиради ёки тахирлашади.

Қаерда сақлаш керак: ўрта жавонда, ёпиқ идишда.

5. Колбаса маҳсулотлари

Тўғри, хом гўшт, товуқ ва балиқ эшикка сиғмайди, аммо баъзилар тилим колбаса ва сосиска маҳсулотларини эшик жавонига қўяди. Бундай жой хавфли бактериялар учун қулай бўлиши мумкин.

Қаерда сақлаш керак: махсус гўшт бўлимида ёки пастки жавонда.

6. Сметана, қаймоқ ёки тухум асосидаги соуслар

Сут ёки тухум қўшилган соуслар (масалан, майонез) жуда нозик ва тез бузиладиган маҳсулотлардир. Музлатгич эшигида улар бактериялар тарқалиши учун идеал шароит яратади.

Қаерда сақлаш керак: музлаткич ичида, орқа деворга яқин жойда. Қопқоғини маҳкам ёпиш ёддан чиқмасин.

Унда музлаткич эшигида нималарни сақлаш мумкин?

• кетчуп, хантал, соя соуси;
• сирка, сут/тухум қўшилмаган соуслар;
• консервалар;
• тузланган бодринг;
• герметик идишдаги ичимликлар;
• сариёғ — унда ёғ кўп, намлик кам, шу сабабли у сутга қараганда бактериялар тарқалишига камроқ мойил бўлади.