Жаҳон банки Европа ва Марказий Осиё мамлакатлари бўйича иқтисодий ўсишни тезлаштириш масаласига оид ҳисобот эълон қилди. Таҳлилда минтақадаги ривожланаётган давлатлар юқори даромадли мамлакатларга етиб олиши учун қанча муддат кераклиги тахмин қилинган.
Ҳисоботда келтирилишича, минтақадаги учта давлат аҳоли жон бошига даромади юқори мамлакатлар (14 минг доллардан кўп) даражасига етиши учун 100 йилдан ортиқ вақт керак. Улар: Ўзбекистон, Озарбайжон ва Тожикистон.
Прогноз мамлакатларнинг охирги ўн йиллик иқтисодий ўсиш суръатларига асосланади.
Иқтисодчи Миркомил Холбоев ўз ҳисоб-китобларидан келиб чиқиб ёзишича, Марказий Осиё давлатлари орасида жон бошига даромадлар Қозоғистонда 2026 йилда 14 минг доллардан ўтади. Туркманистон бу кўрсаткичга 2034 йилда, Тожикистон 2037 йилда, Ўзбекистон эса 2042 йилда етиши мумкин. Яъни Ўзбекистон сўнгги тўрт йилдаги ўртача ўсиш билан минтақада бу даражага энг охирги етадиган мамлакат бўлади.
Жаҳон банки ҳисоботида қайд этилишича, 2025 йилда (2026 йилда ҳам) Ўзбекистон иқтисодий ўсиши 5,9 фоизни ташкил этиши кутилмоқда.
Маълумот учун, 2024 йилда республикада аҳоли жон бошига ҳисобланган ялпи ички маҳсулот ҳажми 3 092 долларни ташкил этган. Мазкур кўрсаткич 2023 йил билан таққослаганда 4,4 фоизга ошган.
Мамлакат 2030 йилгача ялпи ички маҳсулот ҳажмини 160 миллиард долларга, аҳоли жон бошига даромадларни 4 минг долларга етказишни мақсад қилган.
Изоҳ (0)