Тошкент вилояти божхона постида “оздирувчи дори” сифатида сотилиши керак бўлган 1,3 тонна инсон руҳиятига кучли таъсир қилувчи дори воситалари тўхтатиб қолинди. Бу ҳақда Божхона қўмитаси хабар қилди.
Маълумки, ижтимоий тармоқларда оздиришга хизмат қилувчи турли пакетчали чой ва қаҳвалар, капсулалар машҳур шахслар кўмагида гўёки зарарсиздек реклама қилиниб, сотиб келинмоқда. Аммо бу маҳсулотлар таркибида семизликни даволашда қўлланиладиган “Сибутрамин” кучли таъсир қилувчи моддаси мавжуд.
Ушбу модда жорий йилнинг 6 январидан кучли таъсир қилувчи моддалар рўйхатига киритилган бўлиб, унинг ҳаттоки ярим граммини сотиш ҳам жиноий ҳаракат ҳисобланади. “Сибутрамин” инсон юрак-қон томир ва асаб тизимига жиддий ножўя таъсирлар келтириб чиқариши мумкин.
-qI1vqG7R.avif)
Божхона қўмитасининг Тошкент вилояти божхона бошқармаси “Келес” ташқи иқтисодий фаолият божхона пости, бошқарманинг Контрабандага қарши курашиш бўлими ҳамда Марказий божхона лабораторияси ходимлари таркибида “Сибутрамин” моддаси бўлган йирик миқдордаги чой ва қаҳваларни олиб киришга бўлган уринишни фош қилди.
Пойтахтдаги масъулияти чекланган жамиятлардан бирининг номига келтирилган товарларни божхона кўригидан ўтказиш давомида товарлар орасидаги 4 хил турда қадоқланган, оғирлиги эса 1 тонна 313 килограммдан зиёд бўлган оздирувчи чой, қаҳва ва капсулалар таркибида ҳам “Сибутрамин” мавжудлиги аниқланди.
Маълумот учун, жорий йилда республикамиз божхоначилари орқали 1 миллион донадан зиёд кучли таъсир қилувчи дори воситаларининг ноқонуний олиб ўтилишига чек қўйилган.
Изоҳ (0)