АҚШ вице-президенти Жей Ди Венс 10 август куни Россия ва Украина ўртасида эришилиши мумкин бўлган келишув икки томонни ҳам “жуда хурсанд қилмаслигини” айтди. Бу ҳақда Reuters хабар берди.
Жей Ди Венс маҳаллий нашларга берган интервьюсида шундай деган:
“Кун охирида на россияликлар, на украиналиклар келишувдан хурсанд бўлади”.
Вице-президентнинг таъкидлашича, Трамп украиналиклар ва россияликлар нисбатан тинч яшашига олиб келадиган ва урушни тўхтатадиган музокарали келишувни кўзламоқда. Жей Ди Венс илгари Владимир Путин Украина президенти Зеленский билан учрашишдан бош тортган бўлса, эндиликда Дональд Трамп бунга розилик олишга муваффақ бўлганини юқори баҳоламоқда.
Маълум қилинишича, ҳозирда уч томонлама учрашув музокаралари устида иш олиб борилмоқда. Трамп ва Путин 15 август, жума куни АҚШнинг Аляска штатида учрашиши режалаштирилган. Бундан олдин Россия раҳбари 7 август куни Зеленский билан учрашишга қарши эмаслигини, аммо бунинг учун зарур шароитлар яратилиши лозимлигини айтганди.
Путиннинг Зеленский билан Трампдан аввал учрашиши керакми, деган саволга Венс “бу самарали бўлмайди” дея жавоб берди.
“Асосий вазифа АҚШ президенти икки раҳбарни бир жойга тўплашидир”, деган у.
Изоҳ (0)