Яман соҳиллари яқинида африкалик мигрантларни олиб кетаётган қайиқлардан бири 3 август куни ағдарилиб кетди. Ҳодиса оқибатида камида 68 нафар одам ҳалок бўлиб, 74 нафари бедарак йўқолган. Бу ҳақда БМТ Халқаро миграция ташкилотига таяниб, CNN хабар берди.
БМТнинг Ямандаги вакили Абдусаттор Эсоевнинг айтишича, ҳалокат эрта тонгда Яман жанубидаги Абян вилояти соҳилларида, Аден кўрфази яқинида содир бўлган. Қайиқда жами 154 нафар эфиёпиялик мигрант бўлган. Улардан фақат 12 нафари тирик қолган, қолганлар ҳалок бўлган ёки бедарак йўқолган. 54 нафар жасад Ханфар қишлоғи соҳилларига чиқиб қолган. 14 нафар ҳалок бўлганлар Зинзибар шаҳридаги касалхона моргига олиб борилган.
Абян хавфсизлик бошқармаси бу қайиқ ҳалокати юзасидан кенг кўламли қидирув-қутқарув ишлари олиб борилаётганини билдирган. Қирғоқ бўйлаб кўплаб жасадлар топилган. Яман ички урушдан азият чекаётганига қарамасдан, бу мамлакат Шарқий Африка ва Африка Шохи мамлакатларидан (Сомали, Эфиопия ва бошқалар) бой Форс кўрфази давлатларига иш излаб кетаётган мигрантлар учун асосий йўналиш бўлиб қолмоқда. Мигрантлар бу йўлда кўпинча хавфли ва ҳаддан ортиқ тўла қайиқларда контрабандачилар томонидан олиб ўтилади.
Сўнгги йилларда Яман яқинида бир неча бор кемалар чўкиб кетиши оқибатида юзлаб мигрантлар ҳалок бўлган. Жумладан, 2024 йил март ойида 4 та кема ағдарилиши оқибатида 2 киши ҳалок бўлган, 186 киши бедарак йўқолган эди.
Халқаро миграция ташкилоти ҳисоботига кўра, 2024 йилда Яманга 60 мингдан ортиқ мигрант етиб келган. Бу кўрсаткич 2023 йилга нисбатан анча кам (97 минг), бу эса сув ҳавзаларида назорат кучайганидан далолат беради.
Изоҳ (0)