Тошкент шаҳрида болаларга ноқонуний диний таълим берган яна бир шахс аниқланиб, жиноят иши қўзғатилди. Бу ҳақда ДХХ матбуот хизмати хабар берди.
Маълум қилинишича, Қашқадарё вилоятининг Деҳқонобод туманида яшовчи, 1993 йилда туғилган шахс Олмазор туманининг “Жийдали” МФЙда вақтинча истиқомат қилаётган хонадонда 2025 йилнинг май ойидан буён ёшларнинг 15 нафарига ноқонуний диний таълим берган ва бунинг эвазига ҳар биридан 150 доллардан пул олиб келади.
Аниқланишича, республиканинг турли ҳудудларидан келган, 2004—2014 йиллар оралиғида туғилган бу “илм изловчилар”нинг 11 нафари вояга етмаган бўлиб, улар орасида 3 йилдан буён мактабга бормаётган ўқувчи ҳам бор.
Худди шу маҳаллада ижарага олинган яна бир хонадонда ҳам пойтахтнинг Мирзо Улуғбек туманида яшовчи, 1977 йилда туғилган шахс жорий йилнинг июнь ойидан буён 10 нафар болага ноқонуний диний таълим бериб, эвазига ҳар биридан 100 доллар ҳамда егулик учун озиқ-овқат маҳсулотларини талаб қилган.
Ҳуқуқ тартибот органлари томонидан хонадонда текширувлар ўтказилиши эҳтимолини ҳисобга олиб, болаларни яшириш учун қўлбола ертўла қурдирган. Мазкур ертўла, яъни “қудуқ” темир қопқоқ билан ёпилиб, тош ва қум билан беркитилган. Бу билан у болаларнинг ҳаёти хавф остига қўйилган.
Ҳар икки ҳолат бўйича маҳалла фуқаролар йиғинида сайёр суд ўтказилиб, ушбу шахслар Маъмурий жавобгарлик тўғрисидаги кодекснинг 241-моддаси (диний таълимотдан сабоқ бериш тартибини бузиш) асосида жавобгарликка тортилди. Ушбу моддага кўра, махсус диний маълумоти бўлмай туриб ва диний ташкилот бошқаруви марказий органининг рухсатисиз диний таълимотдан сабоқ бериш, худди, шунингдек, хусусий тартибда диний таълимотдан сабоқ бериш БҲМнинг 5 бараваридан 10 бараваригача миқдорда жарима солишга ёки 15 суткагача маъмурий қамоққа олишга сабаб бўлади.
Юқоридаги шахслар ноқонуний диний таълим беришда махсус голограммага эга бўлмаган, норасмий шаклда чоп этилган мавзуга оид адабиётлар ва турли қўлёзмалардан фойдалангани аниқланган. Мазкур йўналишда Фарғона вилоятида олиб борилган тезкор тадбирлар натижасида диний мазмундаги шундай материаллар ноқонуний равишда тайёрлаб келингани фош бўлган.
Бувайда туманида яшовчи, 1991 йилда туғилган фуқаро яшаш хонадони ва ўзига тегишли умумий овқатланиш шохобчасида босмахона ташкил қилиб, диний мазмундаги китобларни чоп этиш билан шуғулланган. У мазкур китобларни Тошкент шаҳри, Тошкент ва Самарқанд вилоятларидаги китоб дўконларига етказиб берган.
Ўтказилган тезкор тадбирлар давомида келгусида сотиш мақсадида тайёрлаб қўйилган 1210 дона китоб, 2000 дона ярим тайёр ҳолатга келтирилган босма маҳсулоти ҳамда 6 та чоп этиш дастгоҳлари ашёвий далил тариқасида расмийлаштириб олинган.
Ушбу шахс 2024 йилнинг июль ойида муқаддам диний мазмундаги китобларни қонунга хилоф равишда чоп этгани учун жаримага тортилган бўлса-да, яна ноқонуний ҳаракатларини давом эттирган.
Ҳозирда мазкур шахсга нисбатан жиноят иши қўзғатилиб, тергов ҳаракатлари олиб борилмоқда.
ДХХ Сурхондарё вилояти Бойсун туманида ҳужра ташкил қилиб, болаларни қийноққа солиб келган йигит қўлга олинганини ҳам хабар қилганди. Унга нисбатан жиноят иши қўзғатилиб, процессуал тартибда қамоққа олинган. Фарғона вилоятининг Ёзёвон, Қўштепа, Данғара, Фарғона туманларида ҳам болаларга ҳужра шароитида ноқонуний диний сабоқ берганлар қўлга тушганди.
Изоҳ (0)