Ўзбекистоннинг қайси ҳудудида нархлар юқори даражада ўсаётгани маълум қилинди

Июль ойида Ўзбекистон бўйича энг юқори йиллик инфляция Фарғона вилоятида кузатилди. Шу билан бирга, қатор ҳудудларда ўртачадан юқори нархлар ўсиши қайд этилди.

Статистика қўмитаси жорий йил июлдаги истеъмол нархлари индексини (инфляция) эълон қилди.

Таҳлилга кўра, ўтган ойда товар ва хизматлар нархларида 0,2 фоизлик дефляция кузатилган. Йиллик инфляция даражаси эса 8,9 фоизни ташкил этган. Таққослаш учун, кўрсаткич июнь ойида 8,7 фоиз эди.

Ўтган ойда истеъмол товарлари нархининг юқори ўсиши Бухоро, Навоий, Наманган, Самарқанд, Сирдарё ва Тошкент вилоятларида кузатилган.

Қатор ҳудудларда ўртача 8,9 фоиздан юқори бўлган инфляция даражалари қайд этилди. Жумладан, Фарғона вилоятида 9,9 фоизлик — энг баланд инфляция кузатилган. Шу билан бирга, қуйидаги ҳудудларда ўртачадан юқори кўрсаткич аниқланди:

• Навоий вилояти — 9 фоиз;
• Хоразм вилояти — 9 фоиз;
• Сурхондарё вилояти — 9,1 фоиз;
• Сирдарё вилояти — 9,5 фоиз.

Мамлакатда июль ойи давомида озиқ-овқат маҳсулотлари 1 фоиз арзонлашган. Ноозиқ-овқат маҳсулотлари эса 0,2 фоиз, хизматлар 0,9 фоиз қимматлашган.

Бир ойда нархларнинг тушиши асосан мева ва сабзавот маҳсулотларида кузатилди. Масалан, мева ва ёнғоқлар гуруҳидаги нархлар 9,1 фоизга, сабзавотлар, илдизмевалилар ва дуккакли маҳсулотларда 4,8 фоизга тушган.

Бир ой ичида соғлиқни сақлаш хизматлари 0,2 фоиз, транспорт 0,5 фоиз, ахборот ва алоқа 0,2 фоиз қимматлашган. Таълим соҳасидаги хизматлар нархи 0,1 фоиз, ресторан ва меҳмонхоналар 0,5 фоиз ошган.

Июль ойида нархлари юқори даражада ўсган товар ва хизматлар рўйхатини бодринг (46 фоиз), карам (11,1 фоиз), совуқ сув ва канализация хизмати (9,3 фоиз) бошқарган. Шунингдек, пропан 6,6 фоизга, чиқинди тўлови 5,6 фоизга, эксплуатация хизматлари 2,6 фоизга, гўшт 2,2 фоизгача қимматлашган.

Дефляция қайд этилган июль ойида бензин нархи 0,6 фоизга, дорилар 0,4 фоизга ошган.

Марказий банк ўтказган сўровда аҳолининг йиллик инфляцион кутилмалари 13,2 фоизга тенг бўлганди. Тадбиркорлик субъектлари эса келгуси 12 ойда инфляция даражаси 11,8 фоизни ташкил этишини кутаётганини билдирган.