Каталониянинг “Барселона” клуби афсонавий баскетболчи Кобе Брайант бренди билан ҳамкорликда 2025/26 йилги мавсум учун иккинчи формасини тақдим этди. Либослар клубнинг доимий ҳамкори — Nike компанияси томонидан ишлаб чиқилган.
Янги либос сариқ рангда бўлиб, унда бинафша ва қора ранглар ҳам уйғунлаштирилган. Дизайн “Лос-Анжелес Лейкерс” баскетбол жамоасининг формасидан илҳомланиб тайёрланган. Маълумки, Кобе Брайант бутун фаолияти давомида айнан ушбу жамоа сафида ҳаракат қилган.
Форманинг кўкрак қисмида “Барселона” клубининг логотипи билан бирга Кобе Брайантнинг “Kobe Sheath” логотипи ҳам акс этган. Ушбу белгида қин ичидаги қилич тасвирланган. Кобе 2014 йилда бу ҳақда шундай деган эди:
Қилич — бу соф истеъдод. Қин эса ушбу истеъдодни бошқарадиган шакл. У инсоннинг ҳаётий тажрибаси ва интизомини ифодалайди.
Клуб матбуот хизматининг таъкидлашича, ушбу форма жасорат, ҳаракат ва доимий ўз устида ишлаш руҳидан илҳомланган. Бу нафақат спорт либоси, балки спорт афсонасига билдирилган ҳурмат ва маданий қадриятларнинг ифодасидир.
Маълумот ўрнида, Кобе Брайант “Барселона” клубининг ашаддий мухлиси бўлган. У 2020 йилда рўй берган авиаҳалокат оқибатида вафот этган.
Изоҳ (0)