Мадриднинг “Реал” клуби президенти Флорентино Перес бразилиялик футболчи Винисиус Жуниор жамоадан кетадиган бўлса, унинг ўрнини “Манчестер Сити” ҳужумчиси Эрлинг Ҳоланд билан тўлдиришни режалаштирмоқда. Бу ҳақда Испаниянинг Cadena Ser нашрига таяниб Championat хабар берди.
Манбага кўра, Переснинг энг катта орзуларидан бири — “қаймоқранглилар” ҳужум чизиғида Эрлинг Ҳоланд ва Килиан Мбаппени бир вақтнинг ўзида синаб кўриш. Ҳоланд трансфери айнан Винисиус Жуниорнинг сотилишидан тушадиган маблағ ҳисобига амалга оширилиши мумкин.
Аввалроқ ОАВда Саудия Арабистони клублари Винисиус учун “Реал Мадрид”га 200 миллион евро таклиф қилишга тайёр экани ҳақида хабарлар тарқалган эди. Агар бу трансфер амалга ошса, клуб Ҳоландни харид қилиш учун яхшигина молиявий имкониятга эга бўлади.
Флорентино Перес илгари ҳам клубга юлдуз футболчиларни жалб этиш бўйича катта лойиҳаларни амалга оширган. Эндиликда у Ҳоланд ва Мбаппени бир жамоада жамлаб, “Реал Мадрид”да навбатдаги “Галактикос” даврини бошламоқчи.
Маълумот учун, ўтган мавсум Эрлинг Ҳоланд “Манчестер Сити” таркибида 48 та ўйинда майдонга тушиб, 34 та гол, 5 та голли узатма муаллифига айланган. Винисиус Жуниор эса “Реал” сафида 58 баҳсда иштирок этиб, ўз ҳисобига 22 та гол, 19 та ассист ёздириб қўйган.
Изоҳ (0)