Ўзбек томошабинларига “Маликам, энди қара” сериалидаги образи орқали яхши таниш бўлган Ҳанде Эрчел тўрт йил ичида биринчи марта AB Talks подкасти учун катта ва жуда очиқ интервью берди. Ўзи ва режалари ҳақида гапиришни, шунингдек, шахсий ҳаёти билан ўртоқлашишни унчалик ёқтирмайдиган актрисанинг мухлислари учун бу қувончли янгилик бўлди.
Юлдузнинг ушбу интервьюси кўпчиликка улар олдида шунчаки чиройли ва жозибадор модел эмас, балки ҳақиқий муваффақиятга эришиш йўлида кўплаб машаққатларни бошдан кечирган кучли шахс турганини кўришга ёрдам берди.
Онасининг вафотига ҳали ҳам кўника олмаётган актриса
Онаси Айлиннинг онкологиядан вафот этиши Ҳанде Эрчел учун даҳшатли зарба бўлди. Актриса, гарчи ҳар доим шундай тўғри тамойилга амал қилиб яшаган бўлса-да, ҳозир ва шу ерда ўзингизда бор нарсани қадрлаш қанчалик муҳимлиги ҳақида кўп гапирди.
Актриса ушбу оғир жудоликка кўникиш жуда қийин эканини таъкидлаган. Бироқ инсонда унутиш қобилияти бор, бу хусусият оғриқни енгишга ёрдам беради. Аммо бу ҳам Ҳандега онасини йўқотишдек мусибатнинг оқибатларидан бутунлай қутулишга ёрдам бермайди. Актриса баъзида жудоликнинг илк кунидагидек кўз ёшларга ғарқ бўлишини ҳам яширмаган.
Она бўлишни орзу қилади
Кўпчилик томошабинлар Ҳанде Эрчелни фарзанд кўришни истамайди, деб ўйлайди. Актриса интервьюда мухлисларининг ушбу тахминлари асоссиз эканини таъкидлади. Актриса она бўлиш энг катта орзуларидан бири эканини айтади.
Ҳанде агар қиз фарзандли бўлса, унга марҳум онасининг исмини қўйишни режалаштирмаяпти. Сабаби унинг яқинда саратонни енгган жияни Мави шундай исмга эга. Маълум бўлишича, Ҳанденинг опаси Гамзе қизига онасининг исмини қўйган.
Хейтерларини асло кечирмайди
Интервью давомида актриса яна бир оғриқли мавзу — ташқи кўриниши ва актрисалик маҳоратини танқид қилишлари ҳақида гапирди. Ҳанде онасининг аҳволи оғирлашган пайтда ва унинг ўлимидан сўнг ижтимоий тармоқларда турли хил миш-мишлар қурбонига айланди. Барча синовлар бир пайтда, кетма-кет келгани учун актрисага уларни енгиш осон кечмаган.
Ҳанде ҳаётининг ўша оғир даврида салбий изоҳлар ёзиб, уни мазах қилишга уринган одамларни ҳеч қачон кечиришга ўзида куч топа олмаслигини айтди.
Шунга қарамай, Ҳанде Эрчел ўша вазиятлардан миннатдор эканини тан олди, чунки айнан улар актрисанинг характерини чиниқтирди ва анча хотиржам бўлишига ёрдам берди. Танқидлар уни яхши томонга ўзгартирди, аммо Ҳанде орқага қараб, бунга муносиб бўлмаганини таъкидлайди.
Онасининг ўлимидан сўнг депрессияга тушиб қолганини яширмади
Актриса онасини йўқотганидан кейин тушкунликка тушиб қолгани ҳақида тўғридан-тўғри гапирмади. Лекин ўшанда у барча ташвишлари ва оғриқлари жамланган ўз қобиғига ўралиб қолганини айтди. Ҳанденинг таъкидлашича, у ўз ҳаёти борлигини эслаган ва у учун курашган. Аммо бу “жанг” унга осон бўлмади: турк сериаллари юлдузи ҳаммасини ташлаб кетишга ҳам тайёр бўлганини айтди.
Ўлимдан қўрқмайди
Онасини вафоти актрисада яна кимнидир йўқотиш қўрқувининг пайдо бўлишига туртки бўлди. Унга жияни Мави билан боғлиқ вазият ҳақиқий зарба бўлди, аммо хайриятки, бу яхшилик билан якунланди.
Шу билан бирга, Ҳанде ўлимдан қўрқмайди ва агар кимдир унга ўлимининг аниқ санаси кўрсатилган хатни берганида, у уни дарҳол очиши аниқ эди. Бунинг сабаби шундаки, “Қалбим эшигимни қоқЛ фильмидаги актриса тўлақонли ҳаёт кечиришга интилади ва келажак қандай бўлишидан қўрқмайди.
Онаси ҳақидаги энг ёрқин хотираси қўшиқчи Сезен Аксу билан боғлиқ
Маълум бўлишича, актрисанинг онаси хонанда Сезен Аксу ижодининг ашаддий мухлиси бўлган. Ҳандедан волидаси ҳақидаги сўнгги хотиралари ҳақида сўралганида, у касалхонада онасига Сезеннинг қўшиқларидан бирини қўйиб берганини, кейин улар жим ўтириб, таронани тинглашганини айтди. Ушбу лаҳза Ҳанде Эрчелнинг хотирасида бутун умрга муҳрланган.
“Инсонни ташқи кўринишига қараб баҳолаб бўлмайди”
Турк сериаллари юлдузи ташқи гўзаллик тоза қалб билан тўлдирилмаса, ҳеч қандай маънога эга эмаслигини алоҳида таъкидлади. Ҳанде Эрчелнинг фикрича, ёвуз одам ҳеч қачон жозибали бўлиб кўринмайди, ҳатто унинг ташқи кўриниши идеалга яқин бўлса ҳам.
“Қанчалик гўзал бўлишни истасанг-да, қалбингда ёмонлик бўлса, бу гўзаллик кўринмайди. Сен чиройлисан, лекин бу муваффақият келтирмайди”, дейди актриса.
Қизнинг тан олишича, бошқаларни фақат ташқи кўринишига қараб баҳолайдиган одамлар уни чарчатади, шунинг учун у ҳеч қачон китобни муқовасига қараб танламайди, балки узоқроқ ва чуқурроқ қарашга ҳаракат қилади.
Изоҳ (0)