Indoneziya ligasining amerikalik basketbolchisi mamlakatga noqonuniy giyohvand moddalarni olib kirishga uringani uchun hibsga olindi. Unga o‘lim jazosi tayinlanishi mumkin. Bu haqda Indoneziya politsiyasiga tayanib CNN xabar berdi.
Texaslik 34 yoshli Jarred Dueyn Shou 7-may kuni hibsga olingan. Politsiyachilar uning Jakartadagi kvartirasiga bostirib kirganda 132 qadoq kannabis borligini aniqlagan.
Indoneziya aeroporti bojxonasiga ko‘ra, basketbolchi Tailanddan shubhali jo‘natma qabul qilgan. 2024-yil noyabr oyidan beri Tailandda kannabis legallashtirilgan. Shou Indoneziyaning giyohvandlikka qarshi qonunlariga ko‘ra aybdor deb topilsa, umrbod qamoq yoki o‘lim jazosiga hukm qilinishi mumkin.
Sportchi 2022-yildan beri Indoneziya Basketbol Ligasining bir nechta klublarida o‘ynab keladi. 2024-yilda “Tangerang Hawks” bilan shartnoma imzolagan. So‘roq paytida Shou politsiyaga kannabisni boshqa basketbolchilar bilan baham ko‘rmoqchi ekanligini aytgan. Uning so‘zlariga ko‘ra, giyohvand modda qadog‘i ichida jami 869 gramm noqonuniy kannabis bo‘lgan.
“Tangerang Hawks” bosh murabbiyi Tikki Suvantikno 15-may kuni jurnalistlarga Shouning qilgan ishidan afsusda ekanliklarini va klub shartnomani buzgani uchun uni darhol jamoadan chetlatganini ma’lum qilgan. Indoneziya Basketbol Ligasi sportchiga umrbod o‘ynashni taqiqlagan.
Birlashgan Millatlar Tashkilotining Giyohvand moddalar va jinoyatchilik bo‘yicha boshqarmasiga ko‘ra, qat’iy qonunlariga qaramay, Indoneziya giyohvand moddalar kontrabandasining yirik markazidir.
Indoneziyada 530 ga yaqin odam, shu jumladan 96 nafar xorijlik, o‘lim jazosiga hukm qilingan. Ularning aksariyati giyohvand moddalar bilan bog‘liq jinoyatlar uchun aybdor deb topilgan. Mamlakatda oxirgi marta 2016-yil iyul oyida bir indoneziyalik va uch nafar xorijlik qatl etilgan edi.
Izoh (0)