Тошкент шаҳрининг Мирзо Улуғбек тумани ҳудудида жойлашган эски саноат зонаси ҳудудида қурилаётган “Ботаника” турар жой мажмуаси қурилиши ҳудуддаги тадбиркорларнинг эътирози сабаб тўхтатилди. Бунга Олий суд маъмурий ишлар бўйича судлов ҳайъати тафтиш инстанциясининг 2025 йил 27 январдаги қарори асос бўлган — суд қарори билан Тошкент шаҳар қурилиш бош бошқармасининг ушбу манзилда кўп қаватли турар жой қуриш учун тадбиркорга берган ижобий хулосаси ҳақиқий эмас деб топилган.
Маълум бўлишича, “United Industrial Эқуипмент” МЧЖ судга мурожаат қилиб, Тошкент шаҳар қурилиш бош бошқармасининг эски саноат зонасида тадбиркорга кўп қаватли уй қуриш ҳуқуқини берувчи 2023 йил 15 августдаги рухсатномасИ ва қурилиш бош бошқармасининг 2023 йил 22 сентябрдаги 95161354-сонли ижобий хулосасини ҳақиқий эмас деб топиш сўраган.
Тошкент туманлараро маъмурий судининг 2024 йил 19 апрелдаги ҳал қилув қарори билан МЧЖларнинг талаблари рад қилинган. Сўнгра иш Тошкент шаҳар маъмурий суди апелляция инстанциясида кўриб чиқилган. Судда иштирок этган Санитария – эпидемиологик осойишталик ва жамоат саломатлиги қўмитаси Тошкент шаҳар бошқармаси мутахассиси “дом” қурилаётган манзил саноат зонасида жойлашганини, белгиланган талабларга асосан турар жой бинолари омборлардан камида 50 метр масофада жойлашган бўлиши кераклигини, мавжуд санитария меъёрларига мос келмаслигини билдирган.
Мирзо Улуғбек тумани Фавқулодда вазиятлар бўлими мутахассиси эса “United Industrial Эқуипмент” ва “Униэқ Финанcе Leasing” МЧЖлар ҳудудидан “Ботаника” кўп қаватли турар жой биноси фундаментигача бўлган оралиқ масофа 4,6 метрни ва энг узоқ масофа 8,3 метрни ташкил этишини, шу боис бинони жойлаштириш схемасида кўрсатиб ўтилган оралиқ масофа талаби бузилганини маълум қилган.
Тошкент шаҳар маъмурий суди апелляция инстанциясининг 2024 йил 29 июндаги қарори билан дастлабки суд қарори ўзгартирилган ва жавобгар Тошкент шаҳар қурилиш бош бошқармасининг 2023 йил 22 сентябрдаги 95161354-сонли хулосаси ҳақиқий эмас деб топилган. Шунингдек, апелляция инстанцияси суди Тошкент шаҳар қурилиш бош бошқармасига нисбатан хусусий ажрим ҳам чиқарган. Унда бошқарма томонидан қайд этилган хато ва камчиликларни бартараф этиш мақсадида чора-тадбирлар белгилаш ва натижаси юзасидан бир ой муддатда Тошкент шаҳар маъмурий судига хабар бериш белгиланган.
Тошкент шаҳар маъмурий суди тафтиш инстанциясининг 2024 йил 13 сентябрдаги қарори билан апелляция инстанцияси қарори ва хусусий ажрими бекор қилиниб, дастлабки суд қарори ўз кучида қолдирилган.
“Дарё” “Ботаника” тураржой мажмуаси қурувчиси Аброр Насриддинов билан ҳам боғланди. Унинг айтишича, Бош прокуратура қурувчи манфаатини кўзлаб суд қарорини бекор қилиш бўйича протест киритган.
“Суднинг биринчи ва учинчи инстанцияларида биз ютган бўлсак, иккинчи, учинчи ва бешинчи инстанцияларни аризачиларнинг шикоятлари қаноатлантирилди. Ушбу ҳудуд илгари совет даврида завод ҳудуди ҳисобланган бўлиб, ҳозирги кунда бу ерда умуман ишлаб чиқариш билан шуғулланилмайди. Шунчаки омборхона сифатида фойдаланилади. Биз билан қўшни ҳудуддаги “УНИЭҚ ENERGY” МЧЖ ва бошқа тадбиркорлар бизнинг қурилишимизга қарши чиқиб, бир йилдан буён барча суд инстанциялари, бошқа ташкилотларга шикоят қилиб келмоқда”, — дейди “Ботаника” тураржой мажмуаси қурувчиси Аброр Насриддинов.
Мазкур ҳудуд президентнинг 2023 йил 26 июлдаги "Тошкент шаҳрини 2030 йилга қадар ижтимоий-иқтисодий ривожлантириш чора-тадбирлари тўғрисида"ги фармони ва Вазирлар Маҳкамасининг 2024 йил 25 мартдаги 149-сонли қарорига мувофиқ Тошкент шаҳрида реновация лойиҳалари доирасига тушган.
Ҳукуматнинг тегишли қарорига мувофиқ низоли ҳудуд реновация ҳудуди ҳисобланиб, у ерда жойлашган саноат, коммунал-омбор, ишлаб чиқариш объектларини шаҳардан ташқарига чиқариш белгиланган. Қурилаётган турар-жой мажмуаси эса, Тошкент шаҳрининг янги Бош режасида акс этган.
Олий суд маъмурий ишлар бўйича судлов ҳайъати тафтиш инстанцияси ҳам мазкур ишни кўриб чиқиб, 2025 йил 27 январь куни Тошкент шаҳар маъмурий суди апелляция инстанциясининг 2024 йил 29 июлдаги қарори ва хусусий ажрими ўз кучида қолганлиги ҳақида қарор қабул қилган. Ва “Ботаника” турар жой мажмуаси қурилишини тўхтатган.
Изоҳ (0)