Ўзбекистонда аҳил оилалар ҳамда ёш келин-куёвлар иштирокида “Оилалар сайли” ўтказилиши маълум қилинди.
“Фаровон оила сари” ойлиги доирасида Халқаро оила куни (15 май) муносабати билан қатор тадбирлар ташкил этилиши режалаштирилган. Оила ва хотин-қизлар қўмитаси бошқарма бошлиғи Мавлуда Низомованинг брифингда маълум қилишича, “Ибратли оила” кўкрак нишони билан тақдирлаш юзасидан таклифларни кўриб чиқиш бўйича 40 нафар вазирлик ва идоралар вакилларидан иборат комиссия тузилган.
Ҳудудий комиссиялар, вазирлик ва идоралар томонидан 5 500 дан ортиқ оиланинг ҳужжатлари ушбу кўкрак нишонига тавсия этилган. Номзод оилалар сони ўтган йилга нисбатан 8,8 бараварга ошган. Мазкур оилалар 40 нафардан ортиқ фаол ва экспертлар томонидан ўрганилиб, 2 000 та оила “Ибратли оила” кўкрак нишони билан тақдирлаш учун саралаб олинган.
Бундан ташқари, жорий йилда вазирлик ва идоралардан ҳам номзодлар тавсия этилиши сўралган бўлиб, улар томонидан кўрсатилган 77 та оила ҳам нишон билан тақдирланиши белгиланган.
15 май — Халқаро оила куни арафасида бўлиб ўтадиган тантанали маросимларда ушбу оилаларга “Ибратли оила” кўкрак нишони ҳамда пул мукофотлари топширилади. Шунингдек, уларнинг яшаш жойларидаги уйларнинг кириш қисмига фахрли белгилар ўрнатилади.
Шу билан бирга, маҳаллаларда 4 миллиондан ортиқ хотин-қизларни оммавий спорт тадбирларига жалб қилиш ишлари давом эттирилади. “Соғлом оила учун бирлашайлик!” спорт марафони, “Спорт сайли” каби оммавий жисмоний фаоллик тадбирлари ўтказилиши режалаштирилган.
Мазкур ойлик доирасида энг муҳим тадбирлардан бири сифатида 15 май куни республиканинг барча туман ва шаҳар марказларидаги истироҳат боғларида “Ибратли оила” кўкрак нишони соҳибалари, аҳил оилалар ҳамда ёш келин-куёвлар иштирокида “Оилалар сайли” — Оилафест ташкил этилади.
Қайд этилишича, тадбирлар оилавий қадриятларни мустаҳкамлаш, соғлом турмуш тарзини тарғиб этиш ва жамиятда оила институтининг нуфузини янада оширишга хизмат қилади.
Оилавий зўравонликдан жабрланган шахс талабига кўра никоҳдан ажрашаётганда муҳлат тайинланмаслиги хабар қилинганди. Шунингдек, 21 февраль куни Сенатнинг тўртинчи ялпи мажлисида “Оила ва хотин-қизларни қўллаб-қувватлаш тизими такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида”ги қонун маъқулланганди.
Изоҳ (0)