Шахмат. Нодирбек Абдусатторов Париждаги турнирда қанча ишлаб топди?

Франция пойтахти Париж шаҳрида шахмат бўйича Freestyle Chess Grand Slam Paris турнири якунига етди.

Ўзбекистонлик шахматчи Нодирбек Абдусатторов 7-ўрин учун кечган курашда россиялик Ян Непомняшчийга 2:0 ҳисобида мағлуб бўлиб, мусобақани 8-ўрин билан якунлади ва 20 минг доллар мукофотига эга чиқди.

Турнир финалида дунёнинг 1-рақамли шахматчиси Магнус Карлсен америкалик Ҳикару Накамура устидан 1,5:0,5 ҳисобида ғалаба қозониб, мусобақа ғолибига айланди. Карлсен ушбу ғалабаси орқали 200 минг доллар пул ишлаб топди. Иккинчи ўринни эгаллаган Накамура 140 минг доллар мукофот олди. 3-ўрин учун кечган курашда Германияда ўтган Grand Slam Tour чемпиони, германиялик Венсан Кеймер худди ўша мусобақанинг вице-чемпиони Фабиано Каруанага имкониятни бой берди — 0,5:1,5. Ушбу ғалабадан кейин Фабиано 100 минг АҚШ долларига эга чиқди.

Мусобақа якунига кўра, барча иштирокчилар эгаллаган ўринларнинг тўлиқ жадвали:

1. Карлсен — 200 минг доллар;
2. Накамура — 140 минг доллар;
3. Каруана — 100 минг доллар;
4. Кеймер — 60 минг доллар;
5. Аржун — 50 минг доллар;
6. Максим Ваше-Лаграв — 40 минг доллар;
7. Иан — 30 минг доллар;
8. Нодирбек Абдусатторов — 20 минг доллар;
9. Прагнанандҳа — 15 минг доллар;
10. Раппорт — 10 минг доллар;
11. Гукеш 7,5 минг доллар;
12. Видит — 7,5 минг доллар.