Bosh prokuratura Toshkent shahar Shayxontohur tumanida hokim yordamchisi fuqarolarning 635 million so‘mini o‘zlashtirgani haqida xabar bergandi. Toshkent shahar hokimligi poytaxtda bunday tavsifga mos keladigan mansabdor shaxs yo‘qligini bildirgach, Bosh prokuratura yana rasmiy axborot bilan chiqdi. O‘zi nima gap?
Jinoyat haqida Bosh prokuratura xabari
Unda Shayxontohur tumanida faoliyat yuritgan hokim yordamchisi M.F. 20 nafar fuqarolarga elektron tarzda bergan tavsiyanomalariga asosan, qabul qilib olgan elektron kalitlardan foydalangan holda jami 427,7 million so‘mlik kredit mablag‘larini qo‘lga kiritib, oilaviy tadbirkorlikni rivojlantirish, jumladan ehtiyojmand oila a’zolarining hunarmandchilik, kasanachilik, tomorqadan samarali foydalanish, kichik ishlab chiqarish, xizmat ko‘rsatish va boshqa turdagi faoliyati yo‘lga qo‘yilishini tashkillashtirmasdan, o‘z ehtiyojlariga sarflab yuborgani keltirilgan.
Shuningdek, M.F. o‘zining qarindoshlari va boshqa 5 nafar fuqarolarga mahalla hududida yashamagan bo‘lsada, qalbaki tavsiyanomalar orqali jami 207,7 million so‘m miqdoridagi kredit mablag‘lari ajratilishiga erishib, o‘zlashtirish yo‘li bilan talon-toroj qilgani, holat yuzasidan jinoyat ishi qo‘zg‘atilgani ma’lum qilingan.
Hokimlik munosabati
Shayxontohur tumani hokimligi tumandagi mahallalarning birida hokim yordamchisi bo‘lib faoliyat yuritgan M.F. 2024-yil 29-noyabr kuni o‘z arizasiga ko‘ra lavozimidan ozod etilganini ma’lum qildi. Poytaxt hokimligi ham buni tasdiqlab, ommaviy axborot vositalaridan axborotni e’lon qilishda ishonchlilik, xolislik va mas’uliyat tamoyillariga amal qilishga chaqirdi.
Bosh prokuratura javobi
Idora bergan axborotga ko‘ra, M.F. 2022-yil 7-oktyabrdan 2024-yilning 29-noyabriga qadar Shayxontohur tumani “Kamolon Darvoza” mahalla fuqarolar yig‘inining mahallada tadbirkorlikni rivojlantirish, aholi bandligini ta’minlash va kambag‘allikni qisqartirish masalalari bo‘yicha hokim yordamchisi lavozimida faoliyat yuritib, tuman hokimining 2024-yil 14-dekabrdagi tegishli qarori bilan egallab turgan lavozimidan ozod qilingan.
M.F. aynan hokim yordamchisi lavozimida faoliyat yuritgan davrida muqaddam e’lon qilingan xabardagi qilmishlarni sodir etgan.
Bosh prokuratura matbuot xizmati axborot haqqoniy va xolis bo‘lishi zarur, deya qayd etdi va jinoyat bo‘yicha e’lon qilingan bayonotlarni jamoatchilikni chalg‘itishga qaratilgan deya baholadi.
Izoh (0)