Toshkent shahrining Yangihayot tumanidagi ko‘p qavatli turar joy majmuasi hududida 3 ta shumtol daraxti ag‘nadi. Aholi tasvirga olgan videolarga ko‘ra, shumtollar birini-ketin ko‘zdan g‘oyib bo‘lgan.
Birinchi kuni tasvirga olganimizda avvaliga daraxtlarning biri, keyinchalik ikkinchisi va uchinchisi yo‘q bo‘lib oldi. Daraxt o‘sib turgan joyda ekskavator ishlayotganini, kavlash ishlari olib borilayotganini videoga olgandim. Ertasi kuni qarasak o‘sha joyda o‘sib turgan daraxtlar g‘oyib bo‘lib qolibdi. Shu sabab videolarni OAV vakillariga yuborib, jamoatchilikni vaziyatdan boxabar qilishga harakat qildik, — deydi ismi sir qolishini so‘ragan yangihayotlik fuqaro.
Mazkur videolar Telegramdagi kanallarda tarqalgach, Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi axborot xizmati rahbari Umida Yusupova jurnalistlarni voqea joyiga taklif qildi.
Voqea joyida jurnalistlarning savollariga javob qaytargan mas’ullar — Yangihayot tuman ekologiya bo‘limi boshlig‘i va xodimlari shumtollar ekskavatorning kotlovan qazish ishlarini bajarayotgan paytda, ehtiyotsizligi oqibatida qo‘porilib ketganini bildirdi.
Yer qatlami shag‘alli bo‘lgani uchun qazish ishlari davomida yer o‘pirilib, kotlovanning ichki qismiga tushib ketgan. Natijada gaz trubasi, simyog‘och va uchta shumtol ag‘nab tushgan. Voqea joyiga yetib kelgan ekologiya xodimlari mutaxassislarni jalb qilgan holda daraxtlarni ildiz qismi bilan olib, bo‘sh joyga ko‘chirishgan. Va daraxtni omon saqlab qolish choralarini ko‘rgan, deydi tuman ekologiya bo‘limi inspektori Farhod Boltaboyev.
Mas’ulning ma’lum qilishicha, holat yuzasidan ekskavator haydovchisiga Ma’muriy javobgarlik to‘g‘risidagi kodeksning 79-moddasiga binoan jami 12 million 580 ming so‘m jarima qo‘llanilgan.
Farhod Boltaboyevning bildirishicha, qurilish ishlarini olib borayotgan tadbirkorga hududdagi daraxtlar va aynan shu uchta shumtol parvarishi, ularga zarar yetkazmaslik majburiyati yuklatilgan.
Ushbu hududda ko‘p qavatli uy qurayotgan Umid Mustafoyevning “Daryo”ga ma’lum qilishicha, ekskavator katlovandan keyingi katok ishlarini bajarayotgan bo‘lgan. Zirillash holati yuz bergan paytda uchta daraxt kotlavan ichiga ag‘nagan.
Ekologiya xodimlari voqea joyiga yetib kelib, maxsus texnikalari yordamida daxatlarni boshqa joyga ko‘chirishdi. Ularga nobud bo‘lgani yo‘q. Va ayni paytda parvarishlanmoqda, deydi quruvchi.
Umid Mustafoyevning qo‘shimcha qilishicha, u ko‘p qavatli uyni qurishdan avval ham hududdagi taxminan 5-6 ta daraxtni nobud qilmasdan, ko‘chirish ishlarini amalga oshirgan.
Besh-oltita daraxt bo‘lgan. Daraxtlarni ko‘chirishga ruxsatnoma olib, aynan shu ko‘chirish ishlari bilan shug‘ullanuvchi tashkilotni jalb qilgan holda daxatlarni nobud qilmay, Toshkent viloyati hududiga ko‘chirganmiz. Birorta daraxt kesib tashlanmagan, deydi u.
Quruvchining aniqlashtirishicha, hududdan ko‘chirilgan daxatlarning o‘z vaqtida boshqa joyga o‘tkaziligi, nobud qilinmay parvarishlanishi uchun har bir daraxtga taxminan 50-60 million so‘m miqdoridagi to‘lovni amalga oshirgan.
“Daryo” tadbirkor bergan ma’lumotga aniqlik kiritib, qurilish maydonida haqiqatdan ham 5-6 ta daraxtlar bo‘lgani va ularning ko‘chirilishi, parvarishiga to‘langan summani bilish maqsadida Ekologiya boshqarmasi, tuman ekologiya bo‘limi, shuningdek, Ekologiya vazirligi qoshidagi ekologik ekspertiza markazi mas’ullari bilan bog‘landi. Ular ma’lumot aniqlashtirilgach, ochiqlanishini ma’lum qildi.
Izoh (0)