O‘zbekistonlik model, aktrisa Shahrizoda Madaminova 20 yoshda. U Livan poytaxti Bayrutda o‘tkazilgan “World next top model — 2024” go‘zallik tanlovida “Osiyo go‘zali — 2024” (Miss Asia—2024) nominatsiyasi g‘olibi bo‘ldi. Aktrisa Ozoda Nursaidovaning “Alamlar” qo‘shig‘iga ishlangan klip hamda bir nechta telenovelladagi obrazlari bilan tomoshabinlarga yaxshi tanish.
— O‘zbekistonda modellarga munosabat u qadar yaxshi emas, buning sababi nimada deb o‘ylaysiz?
— To‘g‘ri, chunki ko‘p qizlar shu sohada ish boshlab, keyin boshqa yomon yo‘llarga kirib ketadi, shuning uchun odamlarning modellar haqidagi fikri o‘zgaradi. Hamma o‘ziga to‘g‘ri bo‘lishi kerak. Ota-onam, yaqinlarim bilishadi qanday odamligimni.
— Instagram’da ham sovchilar kelyapti deb, storis joylab turasiz. Idealingizdagi turmush o‘rtoq qanday bo‘lishi kerak?
— Instagram’da ham idealimdagi inson haqida kam gapiraman. Chunki Xudoning o‘zi bizga qanday odamni berishni biladi, shuning uchun o‘zimning insonimni kutaman. Shu paytgacha hech kimni sevib qolmaganman. O‘zimni juda qattiq yaxshi ko‘raman. Lekin har taraflama meni tushunadigan, qo‘llab-quvvatlaydigan insonni kutyapman. Ulg‘ayganim sari yonimda eshitadigan va tushunadigan insonim bo‘lishi kerakligini anglayapman.
— Kelajakda turmush o‘rtog‘ingiz modellik sohasida faoliyat yuritishingizni istamasa, bu sizga qanchalik ta’sir qiladi, oila uchun san’atdan voz kecha olasizmi?
— Albatta, turmushga chiqqanimdan keyin bu masalada muammo bo‘lmaydi. Ham oila, ham karyerani birdek olib boraman, faqat modellik emas, biznes sohasida. Modellikni tark etishim oson. Bu sohaga kirdim, san’at nonini yedim, o‘zim xohlagan hamma narsani his qilib ko‘rdim va bu men uchun yetarli bo‘ldi. Endi Farg‘onada go‘zallik saloni ochmoqchiman, ayollar uchun yonida ovqatlanish joyi bo‘lgan avtosalon ochish niyatim bor.
— Modellik qilganingizdan afsuslangan paytingiz bo‘lganmi?
— (O‘ylanib) To‘g‘risini aytsam, bo‘lgan. Ko‘p yig‘layman. Odamlarning noo‘rin gap-so‘zlariga, ota-onam yomon gaplar eshitsa avvallari juda ko‘p yig‘lardim. Bu sohani tanlab bekor qilibman deyman-u, lekin baribir kasbimni yaxshi ko‘raman. Shuning uchun menga shogirdlikka keladigan qizlarga ham “Bu kasb osonmas, chiday olsangiz, tayyor tursangiz kiringlar bu sohaga, bo‘lmasa o‘zingiz uchun o‘rganib chiqib ketishingiz mumkin” deb tushuntiraman.
— O‘zbekchilik, qarindosh-urug‘ nima deydi, deymiz. Model, aktrisa bo‘lishingizga ota-onangiz tomonidan qarshiliklar bo‘lganmi?
— Aktrisalikka o‘qiyotganimda “Nima qilasiz qizingizni aktrisa qilib, bizga to‘g‘ri kelmaydi” deganlar ham bo‘lgan. Onam qarindoshlar gapirishyapti, deganlarida “iltimos, nima qilibdi aktrisa bo‘lsam” deb yig‘lardim. Lekin ota-onam tushungan, odamlarning gap-so‘ziga qaramagan va qarshilik qilmagan.
Hozir haqiqiy o‘zbek qizlari ham kamera bilan ishlashni, mashhur bo‘lishni, unga e’tibor qaratishlarini xohlaydi. Modellik maktabimga ro‘molli qizlar ham keladi. Kastingida 100 dan ortiq qizlar qatnashgan Farg‘onada o‘tkazilgan “Vodiy go‘zali” go‘zallik tanlovida ham hijobli qizga hakamlar bilan kelishgan holda 2-o‘rinni berdik.
Shahrizoda Ozoda Nursaidovaning “Alamlar” klipida va yana ko‘plab film, serial, novellalarda rol ijro etgan. Shu bilan birga Instagram sahifasini ham aktiv yuritadi. U ko‘proq modellik ishlari, biznesi va lifestyle videolarini obunachilari bilan bo‘lishadi.
— Nega kliplarda kam ko‘rinyapsiz, deyarli yo‘qsiz? Yulduz Usmonova, Hamdam Sobirov kabi san’atkorlardan klipga taklif bo‘lsa nima deysiz?
— Albatta, agar yaxshi taklif bo‘lsa chiqaman. O‘zi umuman kliplarda kam chiqayotganimga sabab bor — kliplarda mavzu faqat sevgi, sevishganlar. Qaysidir aktyor bilan quchoqlashib rol o‘ynashga to‘g‘ri keladi, men erkaklar bilan yaqin masofada rol o‘ynolmayman, qo‘lini ham ushlolmayman. Shu sababli ham ko‘pchilikka rad javobini berganman. Rejissyorlar ham meni chaqirmay qo‘ygan (kulib).
Videoni to‘liq holda YouTube’dagi “Daryo Lifestyle” kanalida tomosha qiling.
Izoh (0)