27-oktyabr kuni bo‘lib o‘tadigan saylovlarga tayyorgarlik jarayonlarida O‘zbekiston Ekologik partiyasi raisi Abdushukur Xamzayev partiyaning saylovoldi dasturlarida ilgari surilayotgan asosiy g‘oyalarga qisqacha to‘xtalib o‘tdi.
So‘nggi yillarda nafaqat O‘zbekistonda balki, butun dunyoda iqlim o‘zgarishi, yashil hududlarning qisqarishi, suv tanqisligi va boshqa global ekologik muammolar kuzatilayotgan bir vaqtda davlatning ekologiyani asrab avaylash sohasidagi ishtiroki dolzarb ahamiyat kasb etib boradi.
O‘zbekistonda Ekologik partiyasi raisi mamlakatimizda qurilish obyektlaridagi mavjud, ko‘karib turgan ko‘p yillik daraxtlarni ko‘chirib o‘tkazish amaliyotiga ham ko‘p guvoh bo‘linayotganini taʼkidladi.
U nafaqat siyosiy partiya raisi balki soha mutaxassisi sifatida O‘zbekiston sharoitida yaproqbargli daraxtlar 10 yoshdan so‘ng ko‘chirilganda tutib ketishi ehtimoli juda pastligini maʼlum qildi.
“Tan olib aytish kerakki, Maʼmuriy javobgarlik to‘g‘risidagi kodeksda daraxtlar, butalar hamda boshqa o‘simliklar va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazganlik uchun belgilangan jazoning kuchaytirilganiga qaramay ko‘rilayotgan choralar ekologiyaga yetkazilayotgan zararga mutanosib emasligicha qolmoqda.
Bizning partiya mazkur masalada xorijiy davlatlarning qonunchilik amaliyotini hisobga olgan holda Jinoyat kodeksining ekinzorlarni, o‘rmonlarni, daraxtlar yoki boshqa o‘simliklarni shikastlantirish yoxud nobud qilganlik uchun jinoiy javobgarlikni nazarda tutuvchi 198-moddasini qayta ko‘rib chiqish hamda alohida yangi modda bilan daraxtlarni, butalarni, boshqa o‘simliklar va nihollarni qonunga xilof ravishda kesish, kundakov qilish, shikastlantirish, yo‘q qilish yoki boshqa joyga ko‘chirib o‘tkazganlik uchun ham jinoiy javobgarlikni kuchaytirish zarur, deb hisoblaydi.” – Abdushukur Xamzayev.
Shuningdek, partiyaning saylovoldi dasturida qurilish jarayonlaridan daraxtlarni asrab qolish, ko‘chirib o‘tkazmaslik bo‘yicha aniq choralar, daraxtlarni noqonuniy kesgan tadbirkorlarning, kerak bo‘lsa, yerga bo‘lgan huquqini bekor qilishgacha bo‘lgan javobgarlikni qo‘llash takliflari nazarda tutilganligi maʼlum qilindi.
Bundan tashqari, bugun atmosfera havosiga tashlanmalarning 1,3 million tonnasi yoki 58 foizi transport vositalari, 924 ming tonnasi (42 foizi) sanoat korxonalari hissasiga to‘g‘ri kelayotganligi inobatga olib, dasturda atmosferaga chiqadigan zararli gazlarni 2 barobarga kamaytirish bo‘yicha aniq tashabbuslar kiritilganligi taʼkidlandi.
Izoh (0)