Хоразм вилоятининг Урганч шаҳрида ноқонуний сақланаётган шер ҳайвонот боғига топширилди.
Вилоят Экология, атроф-муҳитни муҳофаза қилиш ва иқлим ўзгариши бошқармаси назорат инспекцияси тезкор гуруҳи ҳамда Урганч шаҳар ИИБ ходимлари ҳамкорлигида навбатдаги тезкор рейд тадбири ўтказилган. Рейд давомида фуқаро Э.С. Урганч шаҳар “Ашхобод” маҳалласида жойлашган бинода ёш шерни ноқонуний сақлаб келаётгани аниқланган.
Ҳуқуқбузарга нисбатан Маъмурий жавобгарлик тўғрисидаги кодекснинг 92-моддасига (ҳайвонлар яшайдиган муҳитни муҳофаза қилиш қоидаларини, зоологик ва ботаник коллекцияларни вужудга келтириш ва улар билан савдо қилиш қоидаларини бузиш, худди шунингдек ҳайвонларни ўзбошимчалик билан бошқа жойга кўчириш, иқлимлаштириш ёки чатиштириш) кўра баённома расмийлаштирилиб, у БҲМнинг 5 баробари — 1 миллион 700 минг сўм миқдорида жаримага тортилди.
Шер эса вақтинча сақлаш учун Қорақалпоғистон Республикаси Нукус шаҳрида жойлашган Нукус ҳайвонот боғига топширилди.
Ҳолатга аниқлик киритиш, ёввойи шер боласининг қандай олиб келингани ва қаердан сотиб олинганини аниқлаш юзасидан суриштирув ишларини олиб бориш учун тўпланган ҳужжатлар Урганч шаҳар ИИБга юборилган.
Изоҳ (0)