Афғонистон БМТ Бош ассамблеясининг сентябрь ойида бўлиб ўтадиган 79-сессиясида иштирок эта олмайди, чунки мамлакатнинг янги ҳукуматига ҳали БМТда ўрин берилмаган. Бу ҳақда Қатардаги “Толибон” сиёсий бюроси раҳбари Суҳайл Шаҳин маълум қилди.
Декабрь ойи бошида БМТнинг махсус қўмитаси амалдаги афғон ҳукуматига мамлакатнинг ташкилотдаги ўрнини бериш қарорини кейинга қолдирган эди. Кобулнинг амалдаги расмийлари қўмитанинг бу қарорини ноқонуний деб ҳисоблаган.
“Биз иштирок этишни хоҳлаймиз ва бу бизнинг ҳуқуқимиз. БМТнинг ваколатларни текширувчи қўмитасидан Афғонистоннинг БМТдаги ўрнини Афғонистон Ислом Амирлиги ҳукуматига топширишни талаб қиламиз. Бу Афғонистондан хориж қўшинлари олиб чиқиб кетилганидан кейин ҳам содир бўлмади”, дейди Шаҳин.
2021 йил август ойи бошида “Толибон” афғон ҳукумат кучларига қарши ҳужумни кучайтирган, 15 август куни Кобулга кириб келган ҳамда эртаси куни уруш якунланганини эълон қилган. Август ойининг сўнгги икки ҳафтасида Америка ҳарбийлари ҳимоясида бўлган Кобул аэропортидан Ғарб давлатлари фуқаролари ва улар билан ҳамкорлик қилаётган афғонларни оммавий эвакуация қилиш амалга оширилган.
Август охирида америкалик ҳарбийлар Кобул аэропортини тарк этиб, Афғонистондаги америкалик ҳарбийларнинг қарийб 20 йиллик фаолиятига якун ясаган.
Изоҳ (0)