“Толибон” ҳаракати Афғонистоннинг шу ойдаги Доҳадаги йиғилишида иштирок этишини эркаклар билан чеклашни ва аёллар ҳуқуқларини кун тартибидан чиқариб ташлашни талаб қилмоқда, деб ёзади The Guardian.
Ҳуқуқ ташкилотлари ва собиқ сиёсатчилар назарида афғон аёлларини БМТнинг Афғонистон бўйича бўлажак конференциясидан четлаштириш мамлакатдаги аёллар ва қизларга хиёнат бўлади.
Хабарларга кўра, “Толибон” 30 июнь куни бошланадиган ва халқаро ҳамжамиятнинг Афғонистонга муносабатини муҳокама қилиш учун ташкил этилган БМТнинг Доҳадаги йиғилишига ҳеч бир афғон аёлининг қатнашмаслигини ва аёллар ҳуқуқлари кун тартибига киритилмаслигини талаб қилган.
2021 йил августида Афғонистонда ҳокимиятни қўлга киритганидан бери “Толибон” аёлларнинг таълим олиш, иш ва жамоат жойларига киришини чеклаб қўйган. Март ойида зино учун аёлларни оммавий калтаклаш ва тошбўрон қилиш қайта йўлга қўйилиши хабар қилинган эди.
Human Rights Watch ташкилоти ижрочи директори Тирана Ҳассан аёлларни истисно қилиш “Толибон”нинг “зўравонликлари”ни қонунийлаштириш ва БМТнинг аёллар ҳуқуқлари ва аёлларнинг мазмунли иштироки ҳимоячиси сифатидаги ишончига зарар етказиши мумкинлигини таъкидлаган.
Бу ҳолат “Толибон” иродасига билвосита бўйсунишдир. Қонун, демократия ва барқарор тинчлик жамият аҳолисининг ярмини аёлларга киритмасдан туриб мумкин эмас. Биз ўтмишдаги хатолардан ҳеч нарса ўрганмадик, — дея қўшимча қилган у.
Ташкилотнинг яна бир вакили Афғонистонда содир бўлаётган воқеалар дунёдаги аёллар ҳуқуқлари бўйича энг оғир инқироз ва БМТ шундай йиғилиш ўтказиб, аёллар ҳуқуқларини муҳокама қилмаслиги ва афғон аёлларининг хонада бўлишига йўл қўймаслиги ақл бовар қилиб бўлмайдиган ҳолат эканини айтган.
Уч йиллик дипломатик ҳамкорлик ҳеч қандай натижабермади. Бу нафақат афғон аёлларига, балки бутун дунё аёлларига хиёнатдир, — дея қўшимча қилган вакил.
Изоҳ (0)