Қирғизистон хориждаги дипломатик ваколатхоналари учун офислар сотиб олади

Қирғизистон ўзининг дипломатик ваколатхоналари учун хориждан кўчмас мулк ва дипломатлари учун турар жой сотиб олишни бошлайди. Бу ҳақда республика президенти Садир Жапаров хабар берди.

Жапаровнинг сўзларига кўра, унинг топшириғига биноан Ташқи ишлар вазирлиги Қирғизистоннинг Венгриядаги элчихонаси учун бино сотиб олган. Ҳозирда Швейцария, Австрия ва Новосибирск шаҳрида (Россия) кўчмас мулк сотиб олиш ишлари олиб борилмоқда.

“Нью Йорк (АҚШ) ва Берлинда (Германия) дипломатик ваколатхоналар ходимлари учун хизмат квартиралари сотиб олинади”, деди у.

Жапаров 26 июль куни Парижга амалий ташрифи доирасида Қирғизистоннинг Франциядаги янги элчихонасига ташриф буюрди. Январь ойида элчихона Парижнинг 16-округида жойлашган, давлат мулки сифатида сотиб олинган янги бинога кўчиб ўтди.

Қирғизистон президенти мустақиллик йилларида хорижда кўчмас мулкни ижарага олиш учун сарфланган маблағга бинолар сотиб олиш мумкин бўлганини айтди. У дипломатлар яшайдиган ижарага олинган офис ва квартиралар бюджетга оғирлик қилаётганини таъкидлади.

“Масалан, Нью Йоркда БМТда ваколатхонамиз бор. Бизнинг вакилимизга у ерда 30 йилдан бери квартира ижарага беришмоқда, бунинг учун ойига 5 минг доллар тўлаяпмиз. Тасаввур қилинг, 30 йилда қанча пул сарфланган.

Битта вакилга тўртта квартира қийматининг эквивалентидаги сумма кетди. Агар биз дарҳол кўчмас мулкни сотиб олганимизда эди, у 10 йил ичида ўзини оқлаб, абадий давлат мулки бўлиб қоларди”, деди Садир Жапаров.

У аввалги вазирлар буни ўйлаб кўриши кераклигини таъкидлади.

“Биз ҳозир ҳам кеч эмас, деб ҳисоблаймиз ва хориждаги барча элчиларимиз, консулларимиз ва ходимларимиз учун квартиралар сотиб олмоқдамиз. Бизнинг 30 та давлатда элчихоналаримиз, 11 давлатда консуллик ва БМТда ваколатхонамиз бор.

Ҳар бир элчихонада камида 6-7 нафар ходим бор. Уларнинг ҳар бири квартирани ижарага олади, бунинг учун давлат бюджетидан тўланади. Шундай экан, квартира ва офисларни бир марта сотиб олсак, улар абадий давлат мулки бўлиб қолади”, деди у.

Садир Жапаров хориждаги учта мамлакатда дипломатик ваколатхоналарнинг ўз офислари борлигини айтди. Улардан бири Берлинда, иккинчиси Брюсселда, учинчиси эса Москвада жойлашган.