Qirg‘iziston o‘zining diplomatik vakolatxonalari uchun xorijdan ko‘chmas mulk va diplomatlari uchun turar joy sotib olishni boshlaydi. Bu haqda respublika prezidenti Sadir Japarov xabar berdi.
Japarovning so‘zlariga ko‘ra, uning topshirig‘iga binoan Tashqi ishlar vazirligi Qirg‘izistonning Vengriyadagi elchixonasi uchun bino sotib olgan. Hozirda Shveysariya, Avstriya va Novosibirsk shahrida (Rossiya) ko‘chmas mulk sotib olish ishlari olib borilmoqda.
“Nyu York (AQSH) va Berlinda (Germaniya) diplomatik vakolatxonalar xodimlari uchun xizmat kvartiralari sotib olinadi”, dedi u.
Japarov 26-iyul kuni Parijga amaliy tashrifi doirasida Qirg‘izistonning Fransiyadagi yangi elchixonasiga tashrif buyurdi. Yanvar oyida elchixona Parijning 16-okrugida joylashgan, davlat mulki sifatida sotib olingan yangi binoga ko‘chib o‘tdi.
Qirg‘iziston prezidenti mustaqillik yillarida xorijda ko‘chmas mulkni ijaraga olish uchun sarflangan mablag‘ga binolar sotib olish mumkin bo‘lganini aytdi. U diplomatlar yashaydigan ijaraga olingan ofis va kvartiralar byudjetga og‘irlik qilayotganini ta’kidladi.
“Masalan, Nyu-Yorkda BMTda vakolatxonamiz bor. Bizning vakilimizga u yerda 30 yildan beri kvartira ijaraga berishmoqda, buning uchun oyiga 5 ming dollar to‘layapmiz. Tasavvur qiling, 30 yilda qancha pul sarflangan.
Bitta vakilga to‘rtta kvartira qiymatining ekvivalentidagi summa ketdi. Agar biz darhol ko‘chmas mulkni sotib olganimizda edi, u 10 yil ichida o‘zini oqlab, abadiy davlat mulki bo‘lib qolardi”, dedi Sadir Japarov.
U avvalgi vazirlar buni o‘ylab ko‘rishi kerakligini ta’kidladi.
“Biz hozir ham kech emas, deb hisoblaymiz va xorijdagi barcha elchilarimiz, konsullarimiz va xodimlarimiz uchun kvartiralar sotib olmoqdamiz. Bizning 30 ta davlatda elchixonalarimiz, 11 davlatda konsullik va BMTda vakolatxonamiz bor.
Har bir elchixonada kamida 6-7 nafar xodim bor. Ularning har biri kvartirani ijaraga oladi, buning uchun davlat byudjetidan to‘lanadi. Shunday ekan, kvartira va ofislarni bir marta sotib olsak, ular abadiy davlat mulki bo‘lib qoladi”, dedi u.
Sadir Japarov xorijdagi uchta mamlakatda diplomatik vakolatxonalarning o‘z ofislari borligini aytdi. Ulardan biri Berlinda, ikkinchisi Bryusselda, uchinchisi esa Moskvada joylashgan.
Izoh (0)