Арманистон ҳукумати Ҳиндистон раҳбариятига Pralay баллистик ракеталарини сотиб олиш бўйича мурожаат юборган. Бу ҳақда Деҳлидаги Indian Defense Research Wing нашри хабар берди.
Манбада айтилишича, Арманистон ҳукумати қўшни мамлакатлар билан ҳарбий рақобат кучайиши ортидан баллистик ракеталарга қизиқиш билдира бошлаган. Мамлакат мудофаа ва ҳарбий салоҳиятини кучайтириш учун Ереван Деҳлини ҳамкор сифатида танлаган.
Арманистон қизиқиш билдирган Pralay ракетаси квази-баллистик қурилма ҳисобланади. У қаттиқ ёқилғили ракета бўлиб, “ер-ер” типида ҳаракатланади.
Ҳиндистон расмийлари айтишича, Pralay ҳавода ёнлама траектория бўйлаб 150 километрдан 500 километргача масофадаги нишонларга ҳалокатли зарбалар бера олади.
Арманистоннинг Ҳиндистон билан ҳамкорлик қилиш қарорига Бокудаги маъмуриятнинг янги ҳарбий шартномалари сабаб бўлгани айтилган. Аввалроқ Озарбайжон Исроил билан иттифоқчилик доирасида мамлакатга LОRA баллистик ракета тизимларини олиб келган эди. Бу тизимлар Қорабоғ ва унга ёндош тоғли ҳудудларга ўрнатилган.
Ҳозирча Ҳиндистон ҳукумати Арманистон таклифини тўлиқ ўрганиб чиқмаган. Келишувга эришилган тақдирда қанча ва қандай қийматдаги ракеталар етказиб берилиши ҳақида ҳам маълумот берилмаган.
Изоҳ (0)