Сенатнинг 53-ялпи мажлисида Ўзбекистон Судьялар олий кенгаши таркибига ўзгартиришлар киритиш тўғрисидаги масала ҳам кўриб чиқилди. Бу ҳақда парламент юқори палатаси матбуот хизмати хабар берди.
Муҳокама якунида сенаторлар Ўзбекистон президенти тақдимномасига асосан Музаффар Кукиевни беш йиллик муддатга Судьялар олий кенгашининг доимий асосдаги аъзоси – Судьялар олий кенгашининг судьяси лавозимига, Худойқул Азизов, Аскаржон Ғофуров ва Аҳрорхон Ҳошимхоновни беш йиллик муддатга Судьялар олий кенгашининг жамоатчилик асосидаги аъзоси лавозимига сайлади.
Шунингдек, Қаҳрамон Улжаев Судьялар олий кенгашининг жамоатчилик асосидаги аъзоси лавозимидан озод қилинди. Кўриб чиқилган масала юзасидан Сенатнинг тегишли қарори қабул қилинди.
Ўзбекистон президентининг тегишли фармойишига мувофиқ, бешта вилоят судларининг раислари ўзгарганди. Бундан олдин Ўзбекистонда 6 нафар судья лавозимида ўзгариш рўй бергани, Қашқадарёда фуқаро ногиронлик нафақасини ололмай қолганига сабаб бўлган судьяга чора кўрилгани, Судьялар олий кенгашида бир қатор янги тайинловлар амалга оширилгани тўғрисида хабар берилганди.
Изоҳ (0)