Xitoylik olimlar dunyoda birinchi bo‘lib qandli diabetga chalingan bemorni ildiz hujayralarini ko‘chirib o‘tkazish amaliyoti yordamida kasallikdan davoladi. Tadqiqot natijalari Cell Discovery jurnalida chop etildi, deb yozadi “Pravila Jizni”.
59 yoshli erkak 25 yil davomida qandli diabetning II turidan aziyat chekib kelgan. Kasallik tufayli u oshqozon osti bezining insulin ishlab chiqaradigan deyarli barcha hujayralarini yo‘qotgan va bir necha yil avval shifokorlar unda buyrak ko‘chirish jarrohlik amaliyotini o‘tkazgan. Nashr mualliflarining qayd etishicha, bunday bemorlarda nervlar, buyraklar va yuraklarga zarar yetish xavfi yuqori hisoblanadi.
Bemorni davolash uchun olimlar laboratoriyada oshqozon osti bezining sun’iy ildiz hujayralarini yaratdi, so‘ng ularni bemorning tanasiga ko‘chirib o‘tkazdi. Operatsiya muvaffaqiyatli o‘tdi va ma’lum vaqtdan so‘ng bemor organizmni yana insulin ishlab chiqara boshladi.
Transplantatsiya amaliyoti 2021-yilda amalga oshirilgan. Jarrohlikdan so‘ng bemor 11 hafta davomida insulin qabul qilishni to‘xtatib, dori-darmonlar miqdorini asta-sekin kamaytirib bordi. Oradan bir yil o‘tib dorilardan butunlay voz kechdi.
Tadqiqotlar bemorning oshqozon osti bezi faoliyati samarali tiklanganini ko‘rsatmoqda, — dedi shifokorlardan biri.
Mutaxassisning ta’kidlashicha, bu tibbiyot sohasida sezilarli yutuqlarga erishilganidan dalolat beradi, kelajakda ushbu imkoniyat kasalliklarni davolashda qo‘l keladi.
Shu paytgacha dunyoda bironta ham odam diabetdan to‘liq xalos bo‘lmagandi. Qand miqdorini me’yorda saqlashning yagona yo‘li tartibli ovqatlanish va muntazam jismoniy mashqlar hisoblanadi.
“Biroq bu usulning samaradorligini tasdiqlash uchun ko‘proq tadqiqot kerak”, —deydi olimlar. Shuningdek, mutaxassislar yuqori stress tufayli I toifa diabetga chalingan odamlar uchun ushbu amaliyot mos kelmasligini ta’kidladi.
Izoh (0)