Ўзбекистонга 2023 йилда қанча давлатдан гуманитар ёрдам кириб келгани очиқланди

Ўзбекистонга 2023 йилда қарийб 198 миллион долларлик гуманитар ёрдам кириб келди. Бу ҳақда Иқтисодиёт ва молия вазирлиги ҳисоботида сўз боради.

Қайд этилишича, Ғазначилик томонидан Ўзбекистонга кириб келган гуманитар ёрдамлар тўғрисидаги маълумотлар Божхона қўмитасидан олинган маълумотларга асосан таҳлил қилиниб, ҳисоби юритилиб келинмоқда. Мамлакатга 2023 йил январь—декабрь ойларида 30 та давлатдан умумий қиймати 197 миллион 842 минг доллар миқдорида гуманитар ёрдам юклари кириб келган.

Унинг асосий салмоғи Қуйидаги давлатлар ҳисобига тўғри келади:

• Германия – 71 миллион 379,4 минг доллар (36 фоиз);
• Хитой – 27 миллион 467,6 минг доллар (13,9 фоиз);
• Швейцария – 20 миллион 757,8 минг доллар (10,5 фоиз);
• АҚШ – 23 миллион 234,2 минг доллар (11,8 фоиз);
• Бельгия – 22 миллион 620,2 минг доллар (11,4 фоиз).

Кириб келган гуманитар ёрдам соҳалар кесимида таҳлил қилинганда, соғлиқни сақлашга (169 миллион 233,5 минг доллар), таълимга (247,2 минг доллар), Экология ва атроф-муҳитни муҳофаза қилиш учун (943,2 минг доллар) ҳамда ижтимоий соҳага (1 миллион 244,4 минг доллар) йўналтирилган.

Ушбу даврда кириб келган гуманитар ёрдамларни гуманитар ёрдам олувчи ташкилотлар салмоғига нисбатан олиб таҳлил қилинганда, Соғлиқни сақлаш вазирлиги ҳузуридаги Санитарияэпидемиологик осойишталик агентлиги 58,2 фоизни, “Таъминот ва логистика хизмати” УК 17,2 фоизни, Гематология илмий тадқиқот институти 10,5 фоизни ҳамда “Соғлом авлод учун” халқаро хайрия фонди 11,2 фоизни ташкил этган.

Аввалроқ Ўзбекистон тошқиндан жабрланган афғон халқига гуманитар ёрдам юборгани тўғрисида хабар берилганди.