Telegram’да “Ўзбекистондаги энг даҳшатли аттракцион” деб номланган видео тарқалмоқда. Унда қўрқувдан титраётган қизнинг чархпалак юқорисида ўтиргани, чархпалак трубалари скотчлангани, трос узилиб кетиши мумкинлиги айтилган. “Дарё” ушбу ҳолат қаерда содир бўлганини билиш мақсадида Тоғ-кон, геология ва саноат хавфсизлигини назорат қилиш инспекцияси масъуллари билан боғланди.
Улар ҳозирча бу аттракцион айнан қайси ҳудудда жойлашганидан бехабарлигини, видеони энди кўрганини айтди. Тармоқ фойдаланувчилари эса мазкур чархпалак Андижон шаҳридаги “Боғишамол” паркида жойлашганини тахмин қилмоқда.
Тоғ-кон, геология ва саноат хавфсизлигини назорат қилиш инспекциясининг водий вилоятлари бўйича вакили Дониёр Омонқуловнинг “Дарё”га билдиришича, видеодаги чархпалак “Боғишамол” паркидаги аттракцион бўлса, мазкур истироҳат боғидаги ҳеч қайси аттракцион техник кўрикдан ўтмаган.
Водийнинг 3 та вилоятида 38 та истироҳат боғи бор. Мен учта вилоят учун жавобгарман. Республикадан учта вилоят учун бириктирилган масъулман. Ҳозир Андижондаги мазкур паркка йўл олдим, вазиятни аниқлаштириб хабар берамиз, — дейди Дониёр Омонқулов.
Масъулга кўра, жорий мавсум бошида Наманган ва Фарғона вилоятларидаги мавжуд истироҳат боғларидаги аттракционларнинг деярли барчаси техник кўрикдан ўтган. Фақатгина Андижон вилоятида бу кўрсаткич 60 фоизга етган.
Ушбу вилоятдаги 40 фоиз боғда жойлашган аттракционларнинг ҳеч бири техник кўрикдан ўтмаган, — дейди у.
Эслатиб ўтамиз, “Дарё”нинг 2023 йил мавсуми бошидаги ўрганишларига кўра, Ўзбекистондаги мавжуд 143 та истироҳат боғида жойлашган 1845 та аттракционнинг атиги 5-6 фоизи техник кўрикдан ўтказилган бўлиб, фойдаланиш учун хавфсиз деган хулоса берилган. Қолган аттракционларнинг техник ҳолати номаълум. Жорий мавсумда бу ҳолат қандай экани ҳозирча номаълум.
Изоҳ (0)