Эстония Украинага ҳарбийларини юбориши мумкин. Бу ҳақда президентнинг миллий хавфсизлик бўйича маслаҳатчиси Мадис Ролл Breaking Defence нашрига берган интервьюсида маълум қилди.
Унинг сўзларига кўра, Эстония НАТО миссияси доирасида шундай қадам ташлашга интилмоқда, бироқ қўшинларни жўнатиш кичикроқ коалиция доирасида амалга ошиши мумкин.
Мунозаралар давом этмоқда. Биз барча имкониятларни ҳисобга олишимиз керак. Нима қила олишимиз мумкинлиги борасида фикрларимизни чекламаслигимиз лозим, — деди Эстония президенти маслаҳатчиси.
Шунингдек, у бундай қадамга қарши чиққан НАТО давлатлари “вақт ўтиши билан” ўз фикрини ўзгартиришини истисно қилинмаслигини таъкидлади.
Эстония қўшинлари қўмондони генерал Мартин Херем Украинанинг ғарбий вилоятларига контингент юбориш имконияти ҳақида муҳокамалар бўлганини тасдиқлаган. Эстония ҳарбийлари у ерда ёрдамчи функцияларни бажариши, жумладан, тиббий ёрдам, моддий-техник таъминотда иштирок этиши кутилмоқда.
Ғарб давлатларидан Украинага қўшин юбориш ҳақида биринчи бўлиб Франция президенти Эммануэль Макрон гапирганди. У февраль ойи охирида тегишли муҳокамани бошлаб, “бугунги кунда бу масала бўйича консенсус йўқлигини” таъкидлаган.
Шундан сўнг Франция Украинага ўз ҳарбий контингентини юборишга тайёр давлатлар коалициясини тузган. Ушбу ташаббус Литва, Латвия ва Эстония томонидан қўллаб-қувватланган. Шунингдек, Польша коалицияга қўшилиш имкониятини истисно этмаган.
Изоҳ (0)