Украина ҳарбийлари Россияга қарши урушда илк бор АҚШнинг узоқ масофага учувчи ракеталаридан фойдаланди. Бу ҳақда BBC нашри хабар берди.
Украина Россияга қарши АҚШ томонидан яширин равишда тақдим этилган узоқ масофали баллистик ракеталардан фойдаланишни бошлаганини Америка расмийлари тасдиқлаган. Қуроллар АҚШнинг аввалги ёрдам пакетининг бир қисми сифатида юборилган ва шу ой етиб келган.
Расмийларнинг айтишича, баллистик ракеталар жўнатилгани Украинанинг “оператив хавфсизлигини” таъминлаш учун очиқчасига эълон қилинмаган. Ушбу ракеталар аллақачон камида бир марта Қримдаги Россия нишонларига зарба бериш учун ишлатилган.
Олдинроқ АҚШ президенти Жо Байден 24 апрель куни Украинага 61 миллиард долларлик иқтисодий ва ҳарбий ёрдам кўрсатиш пакетини имзолагани маълум қилинган эди. Ушбу ёрдам доирасидаги Америка қуроллари яқин орада Киевга юборилиши кутилмоқда.
Украина узоқ вақтдан бери 300 км масофагача уча оладиган ракета ва ялпи ўт очиш тизимларни АҚШдан сўраб келган. Байден маъмурияти бу талабни қондириш учун февраль ойида ташаббус кўрсата бошлагани айтилган.
АҚШ расмийлари узоқ масофага учувчи баллистик ракеталарни Украинага топшириш баробарида Киев томонидан бу қуроллар Россия аҳолисига қарши фойдаланилиши мумкинлигидан хавотир билдирган.
Изоҳ (0)