Yevrokomissiya Raqamli xizmatlar to‘g‘risidagi qonunni (DSA) buzilishi mumkinligi sababli TikTok onlayn-platformasi bo‘yicha ikkinchi tekshiruvni boshladi. Bu haqda Yevrokomissiya o‘z veb saytida ma’lum qildi.
Tekshiruvga TikTok Lite ilovasida foydalanuvchilarga videolarni tomosha qilish, yoqtirish va do‘stlarni taklif qilish kabi ba’zi “topshiriqlar”ni bajarish uchun ball to‘plash imkonini beruvchi funksiya sabab bo‘lgan.
Yevrokomissiyaga ko‘ra, ushbu mukofot tizimi qaramlik ta’siri bilan bog‘liq xavflarni sinchkovlik bilan baholamasdan ishga tushirilgan.
17-aprel kuni Yevrokomissiya TikTokdan TikTok Lite uchun xavflarni baholash hisobotini talab qilgan. Kompaniya regulyatorga hujjatlarni taqdim etmagan. TikTok 24 soat ichida xavfni baholash hisobotini taqdim etishi va 3-maygacha boshqa so‘ralgan ma’lumotlarni topshirishi kerak. Aks holda, Yevrokomissiya jarima solishi yoki Yevropa Ittifoqida TikTok Lite mukofotlari dasturini to‘xtatib qo‘yishi mumkin.
Biz TikTok Lite funksiyasi zaharli va ayniqsa bolalarni o‘ziga qaram qilib qo‘yishidan shubhadamiz”, — deb yozdi Yevropaning ichki bozor bo‘yicha komissari Tyerri Breton X ijtimoiy tarmog‘ida.
U, agar TikTok ishonchli dalillar keltirmasa, Yevrokomissiya ilovani mukofotlash dasturini to‘xtatib qo‘yishi mumkinligidan ogohlantirgan.
Biz bu qarordan hafsalamiz pir bo‘ldi. TikTok Lite mukofot tizimi 18 yoshga kirmaganlar uchun mavjud emas va videolarni ko‘rish uchun kunlik cheklov mavjud. Biz Yevrokomissiya bilan muhokamalarni davom ettiramiz, — deya TikTok kompaniyasi vakili o‘z noroziligini bildirgan.
Izoh (0)