Шакарнинг барча категорияси бўйича шаклланган ўртача кунлик нарх 6 фоизга пасайди. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси ахборот хизмати маълум қилди.
Таъкидланишича, Рақобат қўмитаси томонидан ички бозорда ижтимоий аҳамиятга эга маҳсулотлар, хусусан, шакар маҳсулоти реализацияси доимий таҳлил қилиб борилмоқда.
“16 апрелдан маҳаллий ишлаб чиқарувчилар томонидан биржа савдоларига қўйиладиган шакар маҳсулотининг кунлик ҳажми 20 фоизга (2 100 тоннадан – 2 500 тоннага) оширилиб, бошланғич нархи 6 фоизга (13 600 сўмдан – 12 860 сўмга) пасайтирилди. Натижада, шакарнинг барча категорияси бўйича шаклланган ўртача кунлик нарх бир тоннаси учун 13 825,8 минг сўмдан 13 039,1 минг сўмгача, яъни 6 фоизга пасайишига эришилди”, — дейилади қўмита ахборотида.
Қўшимча қилинишича, шакар маҳсулоти нархлари юзасидан доимий мониторинг ўрнатилган бўлиб, унинг нархларини барқарор сақлаш бўйича зарур чора-тадбирлар кўрилмоқда.
Маълумот учун, ички бозорда шакарга бўлган эҳтиёж бир йилда ўртача 600 - 650 минг тоннани ташкил этиб, маҳаллий шакар ишлаб чиқарувчи корхоналарда (қуввати 1,2 миллион тоннадан ортиқ) эҳтиёжни тўлиқ қоплаш имконияти мавжуд.
Изоҳ (0)