Qozog‘iston, Qirg‘iziston va O‘zbekiston Qambarota GES-1 qurilish va ekspluatatsiya loyihasini amalga oshirish maqsadida aksiyadorlik jamiyati tashkil etmoqchi. Qirg‘iziston tomonining loyihadagi ulushi va ustav kapitali 34 foizni, Qozog‘iston va O‘zbekistonniki esa 33 foizni tashkil qiladi.
Tegishli uch tomonlama hukumatlararo bitim loyihasi Qozog‘istonda “Ochiq huquqiy hujjatlar” saytida eʼlon qilindi. Qurilish va loyihani amalga oshirish muddati tugagach, Qambarota GES-1 aksiyalari va aktivlari to‘liq Qirg‘iziston mulkiga o‘tadi.
“Loyiha doirasida tomonlar hamkorligining asosiy tamoyillari Qambarota GES-1 da ishlab chiqariladigan elektr energiyasining hajmini tomonlar belgilagan tashkilotlar tomonidan kafolatli xarid qilishdan iborat”, — deyiladi hujjatda.
2023-yil yanvar oyida Qozog‘iston, Qirg‘iziston va O‘zbekiston energetika idoralari rahbarlari Norin daryosida Qambarota GES-1 qurilishi loyihasini amalga oshirish bo‘yicha yo‘l xaritasini imzolagandi.
Qozog‘iston Energetika vazirligining fikricha, Qambarota GES-1 Qirg‘izistondagi eng yirik elektr stansiyaga aylanishi kerak va Markaziy Osiyo mamlakatlarini elektr energiyasi bilan ta’minlaydi, shuningdek, mintaqaning suv ta’minotini barqarorlashtiradi.
Avvalroq Qirg‘iziston prezidenti Sadir Japarov Qambarota GES-1 qurilishi 5-6 milliard dollarga tushishini ma’lum qilgandi.
Izoh (0)