Жиззах вилоятида 2024 йилда 118 та уй-жой қурилиши кутилмоқда. Бу ҳақда Шавкат Мирзиёев раислигида ўтган йиғилишда маълум қилинди.
Президент матбуот котибининг қайд этишича, уй-жой ва маҳалла инфратузилмасини яхшилаш доимо диққат марказида. Бу йил вилоятда 4,5 минг хонадонли 118 та уй-жой қуриш режа қилинган.
Давлат раҳбари бу етарли эмаслигини айтиб, уй-жой қурилишини кўпайтириш зарурлигини таъкидлади. Дўстлик туманидаги барак уйлар ўрнида янги уй-жой қуриш тажрибаси асосида қолган туманлардаги икки мингга яқин эски уйлар ўрнида 50 минг хонадонли замонавий уйлар қуриш дастурини тасдиқлаш топширилди.
Зомин, Бахмал ва Форишда ҳам уй-жой қуриш дастурлари бошланади.
Талаб юқори туманларда қўшимча уйлар қуриш, Жиззах шаҳридаги перенатал марказ ва кўприкларни таъмирлаш бўйича кўрсатмалар берилди.
Йиғилишда иқтисодиёт тармоқларида Ўзбекистонда ишлаб чиқарилган қурилиш материалларидан фойдаланишни кенгайтириш муҳимлиги ҳам қайд этилди. Хабарда айтилишича, Ўзбекистонда чиқадиган базалт маҳсулотлари ҳам ички эҳтиёжни, ҳам ташқи талабни тўлиқ қоплашга етарли.
Йиғилишда маҳаллий базалт маҳсулотларини халқаро сертификациядан ўтказишга кўмаклашиш, қурилиш, ирригация ва коммунал хўжалигидаги қурилиш нормаларида базалт маҳсулотидан фойдаланишни кўпайтириш лозимлиги таъкидланди. Европа ва бошқа ривожланган давлатлардан олим ва мутахассисларни олиб келиб, бу соҳада илмий-тадқиқот ишларини ривожлантиришга кўрсатма берилди.
Изоҳ (0)