Дарҳол қутулиш керак бўлган хонадонимиздаги 5 та зарарли буюм

Уйдаги жиҳоз ва буюмлар инсонлар оғирини енгил қилиб, юмушларни осонлаштиришга ҳисса қўшади. Аммо айрим хаёлимизга ҳам келтирмаган кундалик рўзғор предметлари соғлиғимизга жиддий зарар етказиши мумкин.

Қуйида ҳаётимизни уларсиз тасаввур этолмайдиган, аммо ўта зарарли буюмлар рўйхати билан танишамиз:

1. Таги ёпишмайдиган това

Антипригар қопламали қозон, това каби идишлар овқат тайёрлаш жараёнида иссиқлик туфайли ўзидан турли зарарли ис ва моддалар кўтаради. Натижада хонадон эгаларида жиддий касалликлар, жумладан, саратонга чалиниш хавфи ошади. Вақтинчалик бўлган қулайлик умрингизга зомин бўлмасин.

2. Идиш-товоқ ювадиган губка

Идишларни ювишда губкалар бекаларнинг энг яхши ёрдамчисига айланган. Бироқ вақтида янгиланмаган губкада турли микроблар йиғилиши, жумладан, ичак таёқчаси касаллиги авж олиши учун қулай муҳит яратади. Шу сабабдан ҳам уни ҳар ҳафтада янгилаб туриш лозим, йўқса ювилган идиш, стол юзаси ва ошхонанинг бошқа ерларида микроб кўпайишига олиб келади.

Губкани микротўлқинли печда ёки идиш ювиш машинасида дезинфекция қилиш фойда бермайди.

3. Ҳаво тозаловчи ва хушбўй спрейлар

Ҳожатхоналарда қўлланадиган бундай спрейлар рекламаси бизга ёқимсиз ҳиддан бир зумда халос бўлишни ваъда қилади. Аммо унинг ҳам бир қатор камчиликлари мавжуд. Ҳаво тозалагичлар таркибидаги кислотали компонентлар тери ва кўзларнинг куйишига олиб келиши, ўпка ва нафас олиш йўлларига зарар етказиши исботланган. Ўткир ҳид эса аллергик реакция келиб чиқишига сабаб бўлиши мумкин.

4. Антибактериал совун

Пандемия даврида антибактериал совунлар микробларга қарши курашда кенг қўлланди. Аммо тадқиқотлар кўрсатадики, антибактериал воситалардан ҳаддан ортиқ фойдаланиш бактерияларнинг антибиотикларга қарши чидамлилиги шаклланишига олиб келади. Чунки антибактериал совунлар барчада учрайдиган қўлдаги фойдали бактерияларни ҳам йўқ қилиб юборади.

5. Гиламлар

Гилам хонадонга кўрк қўшадиган буюм бўлса-да, унда тўпланадиган чанг, турли бактериялар, моғор кабилар нафас йўллари касалликлари ва аллергияга сабаб бўлиши мумкин. Умуман олганда, уйдаги барча текстиль буюмлари — парда, юмшоқ мебеллар, матоли декорларда тўпланадиган чанг хонадаги ҳаво доимий кирланиб туришига олиб келади. Шу боис интерерда матоли предметларни камайтириш мақсадга мувофиқдир.