Uzbekistan Airways Россия шаҳарларига жўнаб кетаётган йўловчиларга мурожаат билан чиқди.
Қайд этилишича, Россия ҳукуматининг фармонига кўра, ҳармала (исириқ) ўсимлиги Россияда гиёҳванд моддаларни ўз ичига олган ва назорат қилинадиган ўсимликлар рўйхатига киритилган. Исириқни мамлакатга олиб кириш билан боғлиқ барча ҳаракатлар Россия Жиноят кодексининг 229.1-моддасига мувофиқ жиноий жавобгарликка тортилади.
“Юқоридагиларни инобатга олган ҳолда, сиздан ушбу турдаги ўсимликни қўл юкингизда ва багажда олиб ўтмаслигингизни сўраймиз”, — дейилади авиакомпания хабарида.
Эслатиб ўтамиз, 2020 йил март ойида Ўзбекистон Соғлиқни сақлаш вазирилиги ҳузуридаги Санитария-эпидемиологик осойишталик агентлиги раҳбари Баҳром Алматов (ҳозирда агентлик директори ўринбосари) коронавирусдан ҳимояланиш учун уй шароитида исириқдан кўпроқ фойдаланишни тавсия қилган эди. Олий Мажлис Сенатининг февраль ойи охирида бўлиб ўтган иккинчи ялпи мажлисида ташриф буюрувчиларнинг иситмаси бор-йўқлиги тепловизорлар ёрдамида текширилгани, кириш жойида қўриқчилардан бири бинода исириқ тутатгани ҳақида хабар берилганди.
Изоҳ (0)