Андижонда 1,3 млрд сўмлик электр энергиясидан ноқонуний фойдаланган ишлаб чиқариш цехи аниқланди

Андижон вилоятида энергия ресурсларидан ноқонуний фойдаланиш ҳолатлари фош этилди, деб хабар беради Бош прокуратура ҳузуридаги департамент.

Қайд этилишича, департаментнинг Бўстон тумани бўлими томонидан “Ўзэнергоинспекция” ҳудудий бошқармаси ходимлари билан ҳамкорлигида рейд тадбири ўтказилган. Тадбирда “А.Ф” МЧЖ масъул шахслари ва бошқалар МЧЖ ишлаб чиқариш цехидаги электр ҳисоблаш ускунаси назорат муҳрни бузиб, электр энергиядан ноқонуний фойдаланиб, давлат ва жамият манфаатларига 1,3 миллиард сўм зарар етказгани аниқланган.

Департаментнинг Андижон шаҳар бўлими ва “Ҳудудгаз Андижон” ГТФ ходимлари ҳамкорлигида ўтказилган рейд тадбирида “А.С.” НТМ масъул шахслари ва бошқалар “Дўстлик” МФЙ ҳудудидаги таълим муассасасини умумий фойдаланишдаги газ тармоғига тижорат мақсадида ўзбошимчалик билан тўғридан тўғри улаб, жами 628,1 миллион сўмлик табиий газдан ноқонуний фойдалангани маълум бўлган.

Шу каби, департаментнинг Хонобод шаҳар бўлими, ИИБ ва вилоят ЭТК ходимлари ҳамкорлигида ўтказилган терговга қадар текширувда “Х.А.” МЧЖ масъул шахслари ва бошқалар, МЧЖнинг савдо марказида умумий фойдаланишдаги электр тармоғига ўзбошимчалик билан уланиб, жами 406,5 миллион сўмлик электр энергиясидан ноқонуний фойдалангани аниқланган.

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари ўтказилмоқда.