Давлат идораларининг коррупцияга қарши курашишдаги фаолияти баҳоланди 

Ўзбекитонда давлат идораларининг коррупцияга қарши курашишдаги фаолияти самарадорлиги рейтинг баҳолари эълон қилинди. 

Қайд этилишича, 2023 йил натижалари бўйича 95 та давлат ташкилотининг, жумладан, 36 та давлат ташкилоти илк маротаба, қолган 59 таси эса такроран баҳолашдан ўтказилган бўлиб, коррупцияга қарши курашиш ишларининг самарадорлиги 0 баллдан 100 баллгача рейтингда баҳоланиб, 42 та ташкилот фаолияти самарадорлиги “яхши” – (81-100 балл), 38 та ташкилот “қониқарли” – (55-80 балл) ва 15 та ташкилот “қониқарсиз” – (55 баллдан паст) тоифаларга ажратилди. 

Таҳлил натижалари давлат ташкилотлари фаолиятидаги коррупцияга қарши курашиш йўналишида бир қатор камчиликлар мавжудлигини кўрсатди. Сурхондарё ва Андижон вилояти ҳокимликларининг коррупцияга қарши курашиш самарадорлиги кетма-кет икки йил давомида “қониқарсиз” баҳоланди. 

Андижон вилояти ҳокимлиги томонидан эса коррупцияга қарши ички назорат тузилмаси штат бирлиги ходими билан жамланмаган. Тоғ-кон саноати ва геология вазирлиги, Марказий банки, “Ўзкимёсаноат” акциядорлик жамиятида биринчи раҳбарларнинг иродаси намоён қилиниб, ходимлар ва кенг жамоатчилик билан коррупцияга қарши курашишда тизимли мулоқот йўлга қўйилган.