Тошкентдаги “Миробод деҳқон бозори” акциядорлик жамияти 2023 йилда 2 миллиард сўмдан зиёд соф фойда кўрди. Бу ҳақда Корпоратив ахборот ягона порталида келтирилган маълумотларда сўз боради.
Қайд этилишича, “Миробод деҳқон бозори” акциядорлик жамияти бухгалтерия баланс кўрсаткичларига мувофиқ, 2023 йил якуни бўйича 2 миллиард 138 миллион соф фойда олган.
Давлат бюджети тўғрисидаги қонунга кўра, жамият 2024 йил 1 июлга қадар 2023 йил якунлари бўйича ўз соф фойдасининг 50 фоизи миқдорида ажратмалар ва давлат улуши бўйича дивидендларни ҳисоблаб, 2024 йилнинг 1 сентябридан кечиктирмай тегишли даражадаги бюджетларга ўтказади.
Жамиятда 2023 йил якуни бўйича эришилган натижаларидан келиб чиқиб, жамият кузатув кенгаши, бошқарув органлари ва ходимларини 2023 йил якуни бўйича рағбатлантиришга 554 миллион сўм ажратилади.
Шунингдек, бозорнинг захира жамғармаси тўлиқ шакллантирилгани сабабли пул маблағи ажратилмайди. Қолган 513 миллион сўм соф фойда жамиятнинг моддий техника базасини мустаҳкамлаш ва ривожлантиришга йўналтирилади.
Эслатиб ўтамиз, 2022 йилда Тошкентдаги деҳқон бозорлари орасида энг кўп соф фойдани ҳам халқ орасида “Госпитальний” номи билан танилган “Миробод деҳқон бозори” олганди — 1,7 миллиард сўм.
Изоҳ (0)