«Фуқаролик ҳолати далолатномаларини ёзиш органлари фаолиятини янада такомиллаштириш чора-тадбирлари тўғрисида» ҳукумат қарори қабул қилинди, деб хабар бермоқда Адлия вазирлиги матбуот хизмати.
Қарорга кўра Тошкент, Самарқанд, Бухоро, Қарши ва Гулистон шаҳарларидаги мавжуд никоҳ уйлари ФҲДЁ бўлимлари этиб қайта ташкил этилди. Ушбу никоҳ уйлари олдин фақат никоҳни қайд қилиш билан шуғулланган бўлса, эндиликда ФҲДЁ бўлими сифатида бошқа турдаги фуқаролик ҳолати далолатномаларини қайд қилиш (туғилиш, ўлим, ажрим ва бошқалар) билан ҳам шуғулланади;
Адлия вазирига мавжуд штатлар доирасида ФҲДЁ бўлимларини ташкил этиш ва тугатиш бўйича қўшимча ваколат берилди.
ФҲДЁ органларида турли йилларда бир хил серия ва рақамли туғилганлик ҳақидаги гувоҳномалар расмийлаштириб берилгани аниқланган ҳолатларда, ушбу гувоҳномаларни қайта расмийлаштириш учун герб йиғими ундирилмаслиги белгиланди.
Шунингдек, қарор билан Адлия вазирлигига вазирлик ва идоралар, маҳаллий ижро этувчи ҳокимият органлари томонидан ҳуқуқий ахборотни тарқатиш ва ундан фойдаланишни таъминлаш бўйича амалга оширилаётган ишларнинг ҳолатини мунтазам мониторинг ва таҳлил қилиб бориш бўйича қўшимча вазифа юклатилди.
Республика бўйлаб ФҲДЁ бўлимлари сони ортиши навбатлар камайиши, масофалар қисқариши, фуқароларнинг вақти ва бошқа ресурслари тежалиши ҳамда хизмат сифатининг ортишига олиб келиши кутилмоқда.
Мавзуга доир: Ўзбекистонда энди никоҳланишга ариза берганлар маҳалла фуқаролар йиғинини хабардор қилиши шарт бўлмайди
Изоҳ (0)