Словакияда 31 ёшли беларуслик аёл айиқдан қочиб вафот этди. Словакия тоғли қутқарув хизмати аёлнинг жасади 15 март куни кечқурун Паст Tatraс тоғларидаги ўрмонда топилганини айтди, дея BBC хабар берди.
Хабарга кўра, аёл шериги билан Демановска водийсида сайр қилаётганида уларга айиқ ҳужум қилган. Улар айиқни кўриб, турли йўналишларга қочган. Аёлнинг жасади унинг ҳамроҳи ёрдам чақирганидан кўп ўтмай қидирувчи ит томонидан топилган.
Айиқ ҳамон ҳудудда айланиб юрган, бироқ қутқарувчилар уни огоҳлантирувчи ўқлар билан қўрқитган. Демановска водийси — чанғи курортлари ва тоғда манзаралари билан сайёҳлар учун машҳур жой, аммо бу ҳудуд зич ўрмонли ва кўплаб тик жарларга эга, шунинг учун аёл қандай вафот этгани, йиқилиб ўлганми ёки айиқ томонидан ўлдирилганми, номаълум.
Словакия атроф-муҳитни муҳофаза қилиш вазирининг ўринбосари агар расмийлар аёлни айиқ ўлдирганини аниқ билсалар, бу маълумотни яширмасликларини айтган. Сўнгги йилларда Словакияда одамларга айиқлар томонидан ҳужум қилиш ҳолатлари бир неча бор кузатилган.
Словакия Атроф-муҳит вазирлиги ЕИнинг атроф-муҳит бўйича кенгашининг навбатдаги йиғилишида айиқларни муҳофаза қилинадиган турлар рўйхатидан олиб ташлаш таклифи билан чиқишда Руминияга қўшилишини ваъда қилган, чунки уларнинг сони етарлича кўп ва энди йўқолиб кетиш хавфи йўқ. Бироқ олимлар Словакияда айиқлар сонида кескин ўсиш кузатилмагани, улар барқарор 1300 та атрофида эканини айтмоқда.
Изоҳ (0)