Slovakiyada 31 yoshli belaruslik ayol ayiqdan qochib vafot etdi. Slovakiya tog‘li qutqaruv xizmati ayolning jasadi 15-mart kuni kechqurun Past Tatras tog‘laridagi o‘rmonda topilganini aytdi, deya BBC xabar berdi.
Xabarga ko‘ra, ayol sherigi bilan Demanovska vodiysida sayr qilayotganida ularga ayiq hujum qilgan. Ular ayiqni ko‘rib, turli yo‘nalishlarga qochgan. Ayolning jasadi uning hamrohi yordam chaqirganidan ko‘p o‘tmay qidiruvchi it tomonidan topilgan.
Ayiq hamon hududda aylanib yurgan, biroq qutqaruvchilar uni ogohlantiruvchi o‘qlar bilan qo‘rqitgan. Demanovska vodiysi — chang‘i kurortlari va tog‘da manzaralari bilan sayyohlar uchun mashhur joy, ammo bu hudud zich o‘rmonli va ko‘plab tik jarlarga ega, shuning uchun ayol qanday vafot etgani, yiqilib o‘lganmi yoki ayiq tomonidan o‘ldirilganmi, noma’lum.
Slovakiya atrof-muhitni muhofaza qilish vazirining o‘rinbosari agar rasmiylar ayolni ayiq o‘ldirganini aniq bilsalar, bu ma’lumotni yashirmasliklarini aytgan. So‘nggi yillarda Slovakiyada odamlarga ayiqlar tomonidan hujum qilish holatlari bir necha bor kuzatilgan.
Slovakiya Atrof-muhit vazirligi YIning atrof-muhit bo‘yicha kengashining navbatdagi yig‘ilishida ayiqlarni muhofaza qilinadigan turlar ro‘yxatidan olib tashlash taklifi bilan chiqishda Ruminiyaga qo‘shilishini va’da qilgan, chunki ularning soni yetarlicha ko‘p va endi yo‘qolib ketish xavfi yo‘q. Biroq olimlar Slovakiyada ayiqlar sonida keskin o‘sish kuzatilmagani, ular barqaror 1300 ta atrofida ekanini aytmoqda.
Izoh (0)