Москвада Марказий Осиёдан келган меҳнат муҳожирининг ўртача ойлик маоши 54,5 минг рублни ташкил этади. Бу, тахминан, 597 доллар ёки 7,5 миллион сўмга (5 март кунги курс бўйича) тенг. Бу ҳақда “Коммерсант” хабар берди.
Ўртача ойлик маошни аниқлаш учун Тожикистон, Қирғизистон ва Ўзбекистон ишчилари ўртасида сўров ўтказилди. Унда 18 ёшдан 60 ёшгача бўлган 900 нафар муҳожир иштирок этди. Мигрантларнинг ярмидан кўпи маошини конвертда олади, ярмидан сал камроғи эса тўрт киши бўлиб ижарага олинган хонада яшайди ва деярли тўртдан бири ҳеч қандай тиббий ёрдам олмайди.
Мигрантларнинг 54,4 фоизи иш ҳақини нақд пулда, кўпинча расмий рўйхатдан ўтмасдан, 30 фоизга яқини эса банк карталари орқали олиши аниқланган. Ўртача даромад ойига 54,5 минг рублни ташкил қилади.
Ўзбекистонликлар қурилишда (25 фоиз), тожикистонликлар эса кимёвий тозалаш, сартарошлик ва бошқа хизматларда (31,8 фоиз) ишлайди. Савдо соҳасида Ўзбекистон фуқароларининг атиги 5 фоизи, Тожикистон ва Қирғизистон фуқароларининг 12 фоизи меҳнат қилади.
Хорижий ишчиларнинг 44 фоизи бирга ижарада яшайди, одатда битта хонада тўрт киши, улардан фақат 4,3 фоизи ўз хонасига эга. Респондентларнинг ярми яшаш жойи бўйича рўйхатдан ўтиш учун норасмий равишда тўлашини тан олди.
Муҳожирларнинг атиги 3,7 фоизи пулли тиббий суғуртага эга, ярмига яқини эса фақат фавқулодда ҳолатларда, деярли чорак қисми эса умуман тиббий ёрдамга мурожаат қилмайди.
Респондентларнинг тўртдан уч нафари иш жойида мулоқот қилиш учун рус тилини етарлича билади, 70 фоизи эса кундалик ҳаётда суҳбатлашишда фойдаланади. Шу билан бирга, сўров иштирокчиларининг қарийб 44 фоизи маҳаллий аҳолининг муҳожирларга нисбатан дўстона муносабатда бўлишини таъкидлаган, 5 фоизи эса уларга нисбатан салбий муносабатда эканлигини билдирган.
Изоҳ (0)