Оқсил тирик ҳужайранинг барча органик элементлари орасида энг муҳим ўринлардан бирини эгаллайди. У ҳужайра массасининг деярли ярмини ташкил қилади. Инсон танасида озиқ-овқат билан бирга келадиган оқсилларнинг доимий алмашинуви соғлиқ учун муҳим. Оқсил етишмовчилигини эрта аниқлаш орқали жиддий касалликларнинг олдини олиш мумкин.
Доимий очликни ҳис қилиш
Тушлик қилгач бир соатдан сўнг яна музлаткич томон йўл оляпсизми? Ҳар ярим соатда бирор нарсани тусаб қолиш оқсил танқислиги аломати бўлиши мумкин. Чунки оқсил моддаси қондаги шакар миқдорини ва тўқлик ҳиссини тартибга солиш вазифасини бажаради. Организмда етарли миқдорда оқсилнинг мавжудлиги ширин ёки тузли маҳсулотларга бўлган эҳтиёжни камайтиради.
Моддалар алмашинувининг бузилиши
Оқсил етишмовчилиги танадаги мушаклар массасининг камайишига олиб келади. Бу эса ўз навбатида метаболизм жараёнини секинлаштиради.
Диққатни жамлай олмаслик
Организмда гормон ва ферментлар ишлаб чиқарилишида оқсил асосий вазифани бажаради. Унинг танқислиги эса бош мия ишлаш сифатини тушириб юборади. Натижада диққатни жамлаш, хотира билан боғлиқ муаммолар юзага келади.
Яра ва жароҳатлар битишининг секин кечиши
Оқсил танқислиги қон айланишини секинлаштиради ва жароҳатлар битиш вақти узаяди. Шунингдек, оқсил моддаси суяклар мўртлашишига ва уларнинг синиш хавфи ортишига сабаб бўлади.
Танада турли шишлар пайдо бўлиши
Қон таркибидаги албумин моддаси оқсилнинг муҳим тури бўлиб, унинг вазифаси организмда суюқлик миқдорини тартибга солишдир. Ушбу модданинг етишмаслиги танада турли шишлар ҳосил қилади.
Тирноқларнинг тез-тез синиши
Инсон организмининг ишлаш қоидаси шундай: биринчи ўринда ҳаёт учун муҳим органларга озуқа моддаларини етказиб бериш лозим. Тирноқ ва сочлар бундай гуруҳга кирмайди. Етарли миқдорда оқсилли таомлар истеъмол қилиш, витамин Д миқдорини назорат қилиш бундай нохушликларнинг олдини олади.
Изоҳ (0)